ആന്റണി വർഗീസ് വിവാഹിതനാവുന്നു, ആശംസകളുമായി ആരാധകർ

മലയാളികളുടെ പ്രിയപ്പെട്ട നടനാണ് ആന്റണി വർഗീസ്. അങ്കമാലി ഡയറീസ് എന്ന ഒറ്റ ചിത്രത്തിലൂടെ തന്നെ മലയാളികളുടെ ഉള്ളിൽ കടന്നുകൂടിയ താരം. മൂന്നേ മൂന്ന് ചിത്രങ്ങൾ മാത്രമേ ആന്റണി വർഗീസിന്റേതായി പുറത്ത് എത്തിയിട്ടുള്ളു. എന്നാൽ യുവതാരങ്ങൾക്ക് ഇടയിൽ ഏറെ ശ്രദ്ധേയനാണ് അദ്ദേഹം. സോഷ്യൽ മീഡിയകളിലും ഏറെ സജീവമാണ് നടൻ. താരത്തിന്റെ പോസ്റ്റുകൾ എല്ലാം തന്നെ വളരെ പെട്ടെന്ന് വൈറൽ ആകാറുമുണ്ട്.

ആന്റണി വർഗീസ് വിവാഹിതനാവുന്നു എന്ന വാർത്തകളാണ് ഇപ്പോൾ പുറത്തുവരുന്നത്.അങ്കമാലി സ്വദേശി അനീഷ പൗലോസ് ആണ് വധു. പ്രണയ വിവാഹമാണ്. വിദേശത്ത് നഴ്സായി ജോലി ചെയ്യുകയാണ് അനീഷ. ഓഗസ്റ്റ് എട്ടിനാണ് അങ്കമാലിയിൽ വച്ചാണ് വിവാഹം.സിനിമാ സുഹൃത്തുക്കൾക്കും മറ്റുമായി ഞായറാഴ്ച റിസപ്ഷൻ ഉണ്ടാകും. അനീഷയുടെ വീട്ടിൽ നിന്നുള്ള ഹൽദി ചടങ്ങിന്റെ ചിത്രങ്ങൾ സമൂഹമാധ്യമങ്ങളിൽ വൈറലാണ്.

ആന്റണിയുടേതായി പുറത്തെത്താനുള്ള പുതിയ ചിത്രം അജഗജാന്തരമാണ്. അങ്കമാലി ഡയറീസ് ടീം വീണ്ടുമൊന്നിച്ച ചിത്രമാണ് അജഗജാന്തരം. കിച്ചു ടെല്ലസ്, വിനീത് വിശ്വം എന്നിവരുടെ തിരക്കഥയ്ക്ക് ടിനു പാപ്പച്ചനാണ് സിനിമ സംവിധാനം ചെയ്തിരിക്കുന്നത്. ആന്റണിക്കൊപ്പം ചെമ്പൻ വിനോദ് ജോസ്, അർജുൻ അശോകൻ, കിച്ചു ടെല്ലസ്, സുധി കോപ്പ, സാബുമോൻ ഉൾപ്പെടെയുളളവരും സുപ്രധാന വേഷത്തിൽ എത്തിയിട്ടുണ്ട്.