ആഗ്രഹം പറഞ്ഞപ്പോള്‍ രണ്ടാമതൊന്നും ആലോചിക്കാതെ ദുല്‍ഖര്‍ സമ്മതം മൂളി, തുറന്ന് പറഞ്ഞ് അനുപമ പരമേശ്വരന്‍

പ്രേമം എന്ന ചിത്രത്തിലൂടെ എത്തി മലയാളികളുടെ മനസില്‍ കയറിക്കൂടിയ നടിയാണ് അനുപമ പരമേശ്വരന്‍. പിന്നീട് തെലുങ്കിലും തമിഴിലും താരം തിളങ്ങി. തെന്നിന്ത്യയിലെ തിരക്കുള്ള താരമായി അനുപമ മാറി കഴിഞ്ഞു. ഇപ്പോള്‍ അഭിനയത്തിന് പിന്നാലെ ക്യാമറയ്ക്ക് പിന്നിലേക്കും കടന്നിരിക്കുകയാണ് നടി. സഹസംവിധായിക ആയി ജോലി ചെയ്യുകയാണ് അനുപമ ഇപ്പോള്‍. ഇത്തരത്തില്‍ സഹസംവിധായിക ആയതിനെ കുറിച്ച് തുറന്ന് പറഞ്ഞിരിക്കുകയാണ് നടി.

ഒരു സഹസംവിധായികയുടെ റോളില്‍ വര്‍ക്ക് ചെയ്യണമെന്നു ആഗ്രഹം തോന്നിയപ്പോള്‍ അത് ആദ്യം പറഞ്ഞത് നടന്‍ ദുല്‍ഖര്‍ സല്‍മാനോട് ആണെന്ന് അനുപമ പറയുന്നു. ഒടുവില്‍ തന്റെ ഏറെ കാലമായുള്ള ആഗ്രഹം നിറവേറിയതിനെ കുറിച്ചും അനുപമ പറയുന്നു. അനുപമയുടെ വാക്കുകള്‍ ഇങ്ങനെ;

‘പ്രേമം’ ചെയ്യുമ്‌ബോള്‍ തന്നെ ഞാന്‍ അല്‍ഫോണ്‍സ് പുത്രനോട് ചോദിച്ചിരുന്നു. എന്നെ അടുത്ത സിനിമയില്‍ അസിസ്റ്റന്റ്‌റ് ആയി ചേര്‍ക്കാമോയെന്ന്, പക്ഷെ അത് സാധിച്ചില്ല. ‘മണിയറയിലെ അശോക’നില്‍ ജോയിന്‍ ചെയ്തത് അഭിനയിക്കാനായിരുന്നു, ദുല്‍ഖര്‍ എന്റെ അടുത്ത സുഹൃത്ത് കൂടിയാണ്. എട്ടു ദിവസത്തോളം ഷൂട്ടിംഗ് കഴിഞ്ഞ ശേഷം ഒരു ദിവസം സംസാരിച്ചിരിക്കുമ്പോള്‍ ഞാന്‍ എന്റെ ആഗ്രഹം എടുത്തിട്ടു. രണ്ടാമതൊന്നു ആലോചിക്കാതെ ദുല്‍ഖര്‍ പറഞ്ഞു.

‘വൈ നോട്ട്? കം ജോയിന്‍’. പിറ്റേന്ന് മുതല്‍ ഞാന്‍ പുതിയ റോളിലായി. കാരവാനില്ല, കുടയില്ല, തനി എഡി പണി. ഫീല്‍ഡില്‍ നിന്ന് ആളെ മാറ്റലും, സ്‌ക്രിപ്റ്റ് ചെക്ക് ചെയ്യലും ക്ലാപ്പടിക്കലും അടക്കം എല്ലാ ജോലിയും ചെയ്തു. ടീമിലെല്ലാവരും പുതിയ ആള്‍ക്കാരായിരുന്നു. നിറയെ ചെറുപ്പക്കാര്‍. അതുകൊണ്ട് ഒന്നിച്ച് പഠിക്കുകയായിരുന്നു ഞങ്ങളെല്ലാം. ക്രൂ താമസിക്കുന്നിടത്ത് തന്നെയാണ് ഞാനും താമസിച്ചത്. കൂടുതല്‍ സൗകര്യങ്ങള്‍ എടുക്കാതിരുന്നത് അസിസ്റ്റന്റ് ഡയറക്ടര്‍ ജീവിതം ശരിക്കും ആസ്വദിച്ച് പഠിക്കണം എന്ന ആഗ്രഹം കൊണ്ടാണ്’.