അപര്‍ണ ബാലമുരളി മലയാളത്തിന് അഭിമാനമായി.

അറുപത്തിയെട്ടാമത് ദേശീയ പുരസ്‌കാരം അക്ഷരാർത്ഥത്തിൽ മലയാളത്തിന്റെ യശസ്സ് ഉയർത്തുകയായിരുന്നു. ഇത്തവണ നിരവധി പുരസ്‌കാരങ്ങളാണ് മലയാളത്തിന് അഭിമാനമായി വന്നെത്തിയത്. മികച്ച നടിയ്ക്കുള്ള പുരസ്‌കാരം അപര്‍ണ ബാലമുരളി നേടിയെടുത്തതും അതിൽ പെടും. തമിഴ് സിനിമയിലെ അഭിനയത്തിനാണ് അപർണ ബാലമുരളിക്ക് അവാർഡ് ലഭിച്ചതെങ്കിലും അതും ഒരു മലയാളത്തിന്റെ നേട്ടമായിരുന്നു. കീര്‍ത്തി സുരേഷിന് ശേഷം മലയാള സിനിമയ്ക്ക് അഭിമാനമായി ദേശീയ പുരസ്‌കാരം നേടി കൊണ്ടാണ് അപര്‍ണ ബാലമുരളി മലയാളത്തിന് കൂടി അഭിമാനമായിരിക്കുന്നത്.

‘ഒരു സെക്കന്റ് ക്ലാസ് യാത്ര’ എന്ന സിനിമയിലൂടെ 2015 ല്‍ ആണ് അപര്‍ണ ബാലമുരളിയുടെ സിനിമ ക്യാരിയറിനു തുടക്കം കുറിക്കുന്നത്. ചിത്രത്തിലെ നായകനായ വിനീത് ശ്രീനിവാസന്റെ ലവ് ഇന്‍ട്രസ്റ്റ് ആയിട്ടായിരുന്നു അപര്‍ണ ആദ്യം വേഷമിടുന്നത്. ഡയലോഗുകള്‍ ഒന്നും ഉണ്ടായിരുന്നില്ലാത്ത ചിത്രം ആയിരുന്നിട്ടും പ്രേക്ഷക ശ്രദ്ധ നേടാന്‍ അപര്‍ണയ്ക്ക് കഴിഞ്ഞു. ചിത്രത്തിലെ അഭിനയത്തിന് ഏഷ്യവിഷന്റെ ന്യൂ സെന്‍സേഷണല്‍ നായിക എന്ന പുരസ്‌കാരം അപര്‍ണ നേടുകയുണ്ടായി.

‘മഹേഷിന്റെ പ്രതികാരം’ എന്ന ചിത്രത്തിലൂടെയാണ് അപർണയെ മലയാള സിനിമ പ്രേക്ഷകർ പിന്നീട് കാണുന്നത്. തേപ്പ് കിട്ടി സങ്കടപ്പെട്ടിരിക്കുന്ന മഹേഷിന്റെ ജീവിതത്തിലേക്ക്, ചേട്ടന്‍ സൂപ്പറാ എന്ന് പറഞ്ഞ് കയറി വന്ന പെണ്‍കുട്ടിയായിട്ടാണ് അപര്‍ണ പിന്നീട് എത്തുന്നത്. ഒരു നടിയുടെ പക്വതയോടെയാണ് മഹേഷിന്റെ പ്രതികാരം എന്ന ചിത്രത്തിൽ അപർണ, ജിംസി എന്ന കഥാപാത്രത്തെ മികവുറ്റതാക്കു ന്നത്. ചിത്രത്തിലെ അഭിനയത്തിനും നിരവധി പുരസ്‌കാരങ്ങള്‍ ആണ് അപര്‍ണയെ തേടിയെത്തിയത്.

പിന്നീട് സൺഡേ ഹോളിഡേ എന്ന ചിത്രത്തിലെ അപർണയുടെ വേഷവും ശ്രദ്ധയമായിരുന്നു. ആസിഫ് അലിയ്‌ക്കൊപ്പമുള്ള അപര്‍ണയുടെ ജോഡി പൊരുത്തം മാധ്യമങ്ങൾ വാനോളം പുകഴ്ത്തുകയും ഉണ്ടായി. പിന്നാലെ ബി ടെക് എന്ന ചിത്രത്തിലും ഇരുവരും ഒന്നിച്ച് അഭിനയിച്ചു. ആ ചിത്രവും മികച്ച ശ്രദ്ധ നേടി. എട്ട് തോട്ടകള്‍ എന്ന ചിത്രത്തിലൂടെയാണ് അപര്‍ണ തമിഴ് സിനിമയിലേക്ക് അരങ്ങേറ്റം കുറിക്കുന്നത്. പിന്നീട് സര്‍വ്വം താളമയം എന്ന ചിത്രം ചെയ്തു. തമിഴിലെ മൂന്നാമത്തെ സിനിമയാണ് സുധ കൊങ്കര സംവിധാനം ചെയ്ത ‘സൂറാറൈ പോട്ര്.’ റിലീസ് ചെയ്ത നാള്‍ മുതല്‍ അപര്‍ണയുടെ അഭിനയമികവ് മാധ്യമങ്ങൾ എടുത്തു പറഞ്ഞു കൊണ്ടിരിക്കുകയായിരുന്നു. അതിന് ശേഷം ധാരാളം അവസരങ്ങളാണ് അമൃതയെ തേടി എത്തിയത്. അഭിനയ മികവിന് അംഗീകാരമായി ദേശീയ പുരസ്‌കാരവും അമൃതയെ തേടി എത്തുകയായിരുന്നു പിന്നെ.