എ.ആർ.റഹ്മാന്റെ മകളും ​ഗായികയുമായ ഖദീജ വിവാഹിതയാവുന്നു

സംഗീത സംവിധായകൻ എ.ആർ.റഹ്മാന്റെ മകൾ വിവാഹിതയാവുന്നു. ഓഡിയോ എൻജിനീയറും ബിസിനസുകാരനുമായ റിയാസദ്ദീൻ ഷെയ്ഖ് മുഹമ്മദ് ആണ് വരൻ. വിവാഹനിശ്ചയം കഴിഞ്ഞ വിവരം ഖദീജ സോഷ്യൽ മീഡിയയിലൂടെ പങ്കുവച്ചു.

ഖദീജയുടെ ജന്മദിനമായ ഡിസംബർ 29 നായിരുന്നു വിവാഹ നിശ്ചയം നടന്നത്. അടുത്ത ബന്ധുക്കളും സുഹൃത്തുക്കളും മാത്രമാണ് ചടങ്ങിൽ പങ്കെടുത്തത്. വിവാഹ തിയ്യതി വൈകാതെ തന്നെ പ്രഖ്യാപിക്കും. ഖദീജ, റഹീമ, അമീൻ എന്നിങ്ങനെ മൂന്നു മക്കളാണ് എ.ആർ.റഹ്മാന്. ഗായിക കൂടിയാണ് ഖദീജ.

എ.ആർ.റഹ്മാൻ സംഗീത സംവിധാനം ചെയ്ത എന്തിരൻ ചിത്രത്തിൽ ‘പുതിയ മനിതാ’ എന്ന ​ഗാനം ആലപിച്ചാണ് ഖദീജ പിന്നണി ​ഗാനരം​ഗത്തേക്ക് എത്തിയത്. മിമി സിനിമയിൽ ഖദീജ പാടിയ റോക്ക് എ ബേ ബേബി എന്ന ഗാനം ഏറെ ശ്രദ്ധ നേടിയിരുന്നു.

ബുർഖ ധരിച്ച് മാത്രം പൊതു ഇടങ്ങളിൽ എത്തുന്ന ഖദീജ മുൻപും വാർത്തകളിൽ ഇടംപിടിച്ചിരുന്നു. എ.ആർ. റഹ്മാന്റെ മകളെ കാണുമ്പോൾ തനിക്ക് വീർപ്പുമുട്ടുന്നുവെന്ന ബംഗ്ലാദേശി എഴുത്തുകാരി തസ്ലീമ നസ്‌റിന്റെ പരാമർ‌ശം വിവാദങ്ങൾക്ക് ഇടവച്ചിരുന്നു. തസ്ലീമയ്ക്ക് മറുപടിയുമായി ഖദീജയും രംഗത്തെത്തിയിരുന്നു. ഈ രാജ്യത്ത് എന്തെല്ലാം പ്രശ്‌നങ്ങൾ നടക്കുന്നു, എന്നിട്ടും ഒരു സ്ത്രീയുടെ വസ്ത്രത്തെക്കുറിച്ചാണല്ലോ ചർച്ചചെയ്യുന്നതെന്ന് ഖദീജ പ്രതികരിച്ചിരുന്നു.

ദുർബലയാകുകയോ ജീവിതത്തിൽ എടുത്ത തിരഞ്ഞെടുപ്പുകളിൽ പശ്ചാത്തപിക്കുകയോ ചെയ്തിട്ടില്ല. ചെയ്യുന്ന കാര്യങ്ങളിൽ സന്തുഷ്ടയാണെന്നും അതിൽ അഭിമാനിക്കുന്നുവെന്നുമായിരുന്നു ഖദീജയുടെ മറുപടി. തന്റെ കുടുംബത്തിലെ സ്ത്രീകൾക്ക് അവർ ആഗ്രഹിക്കുന്നതെന്തും ധരിക്കാൻ സ്വാതന്ത്ര്യമുണ്ടെന്നായിരുന്നു വിവാദങ്ങളോട് റഹ്‌മാൻ പ്രതികരിച്ചത്.