ആശങ്ക വേണ്ട, അരിക്കൊമ്പൻ ഉന്മേഷവാന്‍, ദൃശ്യങ്ങൾ പുറത്തു വിട്ട് തമിഴ്‌നാട് വനംവകുപ്പ്

ചെന്നൈ : കഴിഞ്ഞ ദിവസങ്ങളിൽ അരിക്കൊമ്പനുമായി ബന്ധപ്പെട്ട് പുറത്തുവന്ന വാർത്തകൾ അരികൊമ്പൻ ആരാധകരെ ഏറെ പ്രയാസത്തിലാക്കിയിരുന്നു. ആന അവശനാണെന്ന തരത്തിലുള്ള വിവരങ്ങളും ദൃശ്യങ്ങളുമായിരുന്നു വന്നിരുന്നത്. എന്നാൽ കോതയാര്‍ അണക്കെട്ടിനോടു ചേര്‍ന്നുള്ള വനമേഖലയില്‍ തുറന്നുവിട്ട അരിക്കൊമ്പന്റെ പുതിയ ദൃശ്യങ്ങളാണ് ഇപ്പോൾ തമിഴ്‌നാട് വനംവകുപ്പ് പുറത്തുവിട്ടിരിക്കുന്നത്.

കഴിക്കും മുമ്പ് പുല്ല് കോതയാര്‍ അണക്കെട്ടില്‍ നിന്ന് നന്നായി കഴുകി എടുക്കുന്ന ദൃശ്യങ്ങളാണ് പുറത്ത് വന്നത്. തമിഴ്‌നാട് വനംവകുപ്പ് അഡീഷണല്‍ ചീഫ് സെക്രട്ടറി സുപ്രിയ സാഹു തന്റെ ട്വിറ്റര്‍ അക്കൗണ്ടിലൂടെയാണ് അരിക്കൊമ്പന്റെ ദൃശ്യങ്ങള്‍ പുറത്ത് വിട്ടത്. ദൃശ്യങ്ങളിൽ നിന്ന് തന്നെ ആനയ്ക്ക് കാര്യമായ പ്രശ്നങ്ങൾ ഒന്നും തന്നെ ഇല്ലെന്ന് വ്യക്തമാണ്. പുതിയ ഇടാവുമായി അരിക്കൊമ്പൻ ഇണങ്ങിത്തുടങ്ങി.

അരിക്കൊമ്പന്റെ ആരോഗ്യ നിലയും നീക്കങ്ങളും തമിഴ്‌നാട് വനംവകുപ്പ് നിരീക്ഷിച്ച് വരികയാണെന്നും സുപ്രിയ സാഹു വ്യക്തമാക്കി. കളക്കാട് മുണ്ടുന്തുറ കടുവാ സങ്കേതത്തിലെ നിബിഡ വനമേഖലയിലേക്ക് ചൊവ്വാഴ്ച പുലര്‍ച്ചെയാണ് ആനയെ മാറ്റിയത്. പത്ത് വാച്ചര്‍മാര്‍, നാല് ഫോറസ്റ്റ് റേഞ്ച് ഓഫീസര്‍മാര്‍, രണ്ട് ഡെപ്യൂട്ടി ഡയറക്ടര്‍മാര്‍ എന്നിവരടങ്ങിയ സംഘമാണ് അരിക്കൊമ്പനെ നിരീക്ഷിക്കുന്നത്.