ഷാജഹാൻ ഷെയ്ഖിനെ അറസ്റ്റ് ചെയ്യാൻ ഉത്തരവിട്ട് ഗവർണ്ണർ,ഭീകര ബന്ധം

പശ്ചിമ ബംഗാളിൽ റെയ്ഡിനെത്തിയ ഇ ഡി ഉദ്യോഗസ്ഥരെ ആക്രമിച്ച തൃണമൂൽ നേതാവ് ഷാജഹാൻ ഷെയ്ഖിനെ അറസ്റ്റ് ചെയ്യാൻ ഉത്തരവിട്ട് ഗവർണ്ണർ ഡോ സി വി ആനന്ദബോസ്. ഷാജഹാൻ ഷേയ്ക്ക് അതിർത്തി കടന്ന് രക്ഷപെട്ടു എന്ന വിവരങ്ങൾ വരുന്നുണ്ട്. ഇയാൾക്ക് ഭീകര ബന്ധം ഉള്ളതായ വിവരങ്ങളും അന്വേഷിക്കാൻ ഉത്തരവിട്ടു

ഇ ഡി ഉദ്യോഗസ്ഥരെ ആക്രമിച്ച ക്രിമിനലിനെ ഉടൻ അറസ്റ്റ് ചെയ്യണം എന്ന് സംസ്ഥാന പോലീസ് മേധാവിക്കാണ്‌ ഗവർണ്ണർ നിർദ്ദേശം നല്കിയത്. അറസ്റ്റ് ചെയ്യാൻ പറ്റുന്നില്ലെങ്കിൽ കുറ്റവാളി എവിടെയാണ്‌ ക്യാമ്പ് ചെയ്യുന്നത് എന്ന് ഉടൻ അറിയിക്കണം എന്നും ആവശ്യപ്പെട്ടിട്ടുണ്ട്.

ചില പോലീസ് ഉദ്യോഗസ്ഥരുടെ ഒത്താശയോടെ ഷാജഹാൻ ഷെയ്ഖിനെ ചില രാഷ്ട്രീയ നേതാക്കൾ പിന്തുണയ്ക്കുന്നുവെന്ന പരാതി രാജ്ഭവനിലെ ശാന്തിമുറിയിൽ ലഭിച്ചതിനെത്തുടർന്നാണ്‌ ഗവർണ്ണരുടെ നടപടി.

പശ്ചിമ ബംഗാളിൽ എൻഫോഴ്സ്മെൻ്റ് ഡയറക്ടറേറ്റ് ഉദ്യോഗസ്ഥർക്ക് നേരെ നടന്ന ആക്രമണം രാജ്യത്തെ ഞെട്ടിച്ചിരിക്കുകയാണ്. പശ്ചിമ ബംഗാളിലെ നോർത്ത് 24 പർഗാനാസിൽ തൃണമൂൽ കോൺഗ്രസ് നേതാവിൻ്റെ വീട് പരിശോധിക്കാൻ എത്തിയ തങ്ങളുടെ ഉദ്യോഗസ്ഥരെ ആയിരത്തോളം വരുന്ന തൃണമൂൽ കോൺഗ്രസുകാർ ആക്രമിക്കുകയായിരുന്നു. ഇ ഡിയുടെ വാഹനങ്ങൾ തകർത്ത് ഉദ്യോഗസ്ഥരെ തല്ലി ചതച്ചു.നോർത്ത് 24 പർഗാനാസ് ജില്ലയിലെ സന്ദേശ്ഖാലി പ്രദേശത്ത് താമസിക്കുന്ന തൃണമൂൽ കോൺഗ്രസ് നേതാവ് ഷാജഹാൻ ഷെയ്ഖിൻ്റെ വസതിയിലേക്കുള്ള യാത്രാമധ്യേയാണ് നേതാവിന്റെ അനുയായികൾ ജനക്കൂട്ടം ഇഡി ഉദ്യോഗസ്ഥരെ ആക്രമിച്ചത്.

റേഷൻ വിതരണ അഴിമതിയുമായി ബന്ധപ്പെട്ട് തൃണമൂൽ കോൺഗ്രസ് നേതാവിൻ്റെ വീട്ടിൽ റെയ്ഡിനെത്തിയ ഇഡി ഉദ്യോഗസ്ഥരാണ് ആക്രമിക്കപ്പെട്ടത്.അക്രമി സംഘം തങ്ങളുടെ നേരെ പാഞ്ഞടുക്കുകയും ഉദ്യോഗസ്ഥരിൽ നിന്ന് മൊബൈൽ ഫോണുകളും ലാപ്‌ടോപ്പുകളും പണവും തട്ടിയെടുക്കുകയും ചെയ്തതായി കേന്ദ്ര അന്വേഷണ ഏജൻസി പ്രസ്താവനയിൽ വ്യക്തമാക്കി. മൂന്ന് ഇൻഫോം ഡയറക്ടറേറ്റ് ഉദ്യോഗസ്ഥരെ ജനക്കൂട്ടം വളരെ ക്രൂരമായി ആക്രമിച്ചു എന്നാണ് ഇഡി പ്രസ്താവനയിൽ അറിയിച്ചത്. ഈ മൂന്ന് ഉദ്യോഗസ്ഥർക്ക് ഗുരുതരമായി പരിക്കേറ്റിട്ടുണ്ട്.