എനിക്ക് വേണ്ടി കാശ് ചോദിയ്ക്കാന്‍ വേറൊരു തെണ്ടിയുടെ ആവശ്യമില്ല, ഫേക്ക് പ്രൊഫൈലിനെതിരെ അരുണ്‍ ഗോപി

തന്റെ പേരിലുള്ള വ്യാജ ഫേസ്ബുക്ക് അക്കൗണ്ടിനെതിരെ രംഗത്ത് എത്തിയിരിക്കുകയാണ് സംവിധായകന്‍ അരുണ്‍ ഗോപി. തന്റെ പേരിലുള്ള വ്യാജ അക്കൗണ്ട് വഴി പണം ചോദിച്ചു കൊണ്ടുള്ള മെസേജുകളുടെ സ്‌ക്രീന്‍ ഷോട്ട് പങ്കുവെച്ചുകൊണ്ടാണ് അരുണ്‍ ഗോപി രംഗത്ത് എത്തിയത്. സോഷ്യല്‍ മീഡിയയിലൂടെയാണ് അദ്ദേഹം വ്യാജനെ പൊളിച്ചത്.

തനിക്ക് സ്വന്തമായി ഒരു വെരിഫൈഡ് അക്കാണ്ട് ഉണ്ട്. വ്യാജന്‍മാരെ ശ്രദ്ധിക്കുക എന്ന നിര്‍ദേശം നല്‍കിയാണ് അരുണ്‍ ഗോപി തന്റെ അതേ പ്രൊഫൈല്‍ ചിത്രം ഉപയോഗിച്ചിരിക്കുന്ന ‘Arun Gopyo’ എന്ന ഫെയ്‌സ്ബുക്ക് അക്കൗണ്ടിന്റെ സ്‌ക്രീന്‍ഷോട്ടുകള്‍ പങ്കുവച്ചത്.

‘ഇതാ ഒരു അപരന്‍.. ശ്രദ്ധിക്കുക എനിക്ക് വെരിഫൈഡ് ആയ ഒരു അക്കൗണ്ട് ഉണ്ട് മറ്റൊന്നും എന്റേതല്ല ദയവായി ശ്രദ്ധിക്കുക.. എനിക്ക് വേണ്ടി കാശ് ചോദിയ്ക്കാന്‍ വേറൊരു തെണ്ടിയുടെ ആവശ്യമില്ല’ എന്നാണ് സംവിധായകന്‍ ഫെയ്‌സ്ബുക്കില്‍ കുറിച്ചിരിക്കുന്നത്.

അരുണ്‍ ഗോപി പങ്കുവെച്ച സ്‌ക്രീന്‍ ഷോട്ടുകളില്‍ ഒരു ഗൂഗിള്‍ പേ നമ്പര്‍ നല്‍കി പണം അയക്കാന്‍ ആവശ്യപ്പെടുന്നത് വ്യക്തമാണ്. സംവിധായകന്‍ സിബി മലയിലിന്റെ പേരിലും നേരത്തെ സമാനമായ ഫേക്ക് അക്കൗണ്ടുകള്‍ ഉണ്ടായിരുന്നു. ഇതിനെതിരെ അദ്ദേഹം തന്നെ രംഗത്ത് എത്തിയിരുന്നു.

എന്റെ പേരില്‍ ഒരു fake id ഉണ്ടാക്കി ഒരുപാട് പേരില്‍ നിന്നും പണം ആവശ്യപ്പെടുന്നത് ശ്രദ്ധയില്‍ പെട്ടു. ഞാന്‍ google pay user അല്ല, ആരും fb messenger ഇല്‍ എന്റെ id ഇല്‍ നിന്നും വരുന്ന മെസേജുകള്‍ക്ക് പ്രതികരിക്കരുത്, പണം അയക്കുകയും ചെയ്യരുത്,’ എന്നാണ് സിബി മലയില്‍ പ്രതികരിച്ചത്.