കോടിക്കണക്കിന് ജനതയുടെ ഹൃദയം കീഴടക്കിയ നേതാവാണ് അടൽ ബിഹാരി വാജ്‌പേയി, പുതുതലമുറയ്ക്ക് പ്രചോദനം

കോടിക്കണക്കിന് ജനതയുടെ ഹൃദയം കീഴടക്കിയ നേതാവായിരുന്നു അടൽ ബിഹാരി വാജ്‌പേയിയെന്ന് കേന്ദ്രമന്ത്രി അനുരാഗ് ഠാക്കൂർ. അദ്ദേഹത്തിൽ നിന്ന് പ്രചോദനം ഉൾകൊണ്ടാണ് പുതിയ തലമുറയുടെയും പ്രവർത്തനമെന്നും കേന്ദ്രമന്ത്രി അനുരാഗ് ഠാക്കൂർ പറഞ്ഞു.

വാജ്പേയിയുടെ അഞ്ചാം ചരമവാർഷികത്തിൽ ഡൽഹിയിൽ അദ്ദേഹത്തിന്റെ സ്മൃതി മണ്ഡപത്തിൽ രാഷ്‌ട്രപതി ദ്രൗപതി മുർമു, ഉപരാഷ്‌ട്രപതി ജഗദീപ് ധന്കർ, പ്രധാനമന്ത്രി നരേന്ദ്രമോദി, കേന്ദ്രമന്ത്രിമാർ, എൻഡിഎ കക്ഷി നേതാക്കൾ തുടങ്ങിയവർ പുഷ്പാർച്ചന നടത്തുകയും ചെയ്തു.
പുരോഗതിയിലേക്കും 21-ാം നൂറ്റാണ്ടിന്റെ വിശാലതയിലേക്കും രാജ്യത്തെ നയിച്ച വ്യക്തിത്വമാണ് വാജ്‌പേയിയെന്ന് പ്രധാനമന്ത്രി നരേന്ദ്രമോദിയും അനുസ്മരിച്ചു.

1942 മുതൽ രാഷ്‌ട്രീയ സ്വയംസേവക സംഘത്തിന്റെ പ്രചാരകനായി പൊതുരംഗത്ത് സജീവമായ അടൽ ബിഹാരി വാജ്പേയ് 1951-ലാണ് ഭാരതീയ ജനസംഘത്തിലേക്ക് നിയോഗിക്കപ്പെട്ടത്. 1957-ൽ ബൽറാംപൂരിൽ നിന്നും ലോക്സഭയിലെത്തിയ അദ്ദേഹം വിവിധ കാലഘട്ടങ്ങളിൽ പാർലമെന്റിൽ നടത്തിയ പ്രസംഗങ്ങൾ ഏറെ ശ്രദ്ധേയമായിരുന്നു.

1996,1998 ലും കുറച്ചു ദിവസങ്ങൾ മാത്രം പ്രധാനമന്ത്രിയായ് വാജ്‌പേയ് 1999 മുതൽ 2004 വരെ പ്രധാനമന്ത്രി കസേരയിലിരുന്ന് രാജ്യത്തെ നയിച്ചു. ദേശീയ ചിന്താധാരയിലേക്ക് ഒരു തലമുറയെ കൈപിടിച്ച് നടത്തിയ വാജ്പേയ് 2018 ഓഗസ്റ്റ് 16-നാണ് അന്തരിച്ചത്.