അസംബ്ലിയിൽ പരസ്യമായി ദളിത്‌ വിദ്യാർത്ഥിയുടെ തലമുടി മുറിച്ചു, പ്രധാന അദ്ധ്യാപികക്കെതിരെ ജാമ്യമില്ലാ കേസെടുത്തു

കാസർകോട്: ദളിത്‌ വിദ്യാർത്ഥിയുടെ തലമുടി സ്കൂൾ അസംബ്ലിയിൽ വെച്ച് പ്രധാനദ്ധ്യാപിക പരസ്യമായി മുറിച്ചതായി പരാതി. കാസർകോട് ചിറ്റാരിക്കാലിലെ കോട്ടമല മാർ ഗ്രിഗോറിയോസ് മെമ്മോറിയൽ എയുപി സ്കൂളിലാണ് സംഭവം നടന്നത്. അഞ്ചാം ക്ലാസ് വിദ്യാർത്ഥിയായ 11കാരനെ പ്രധാനാദ്ധ്യാപിക സ്റ്റാഫ് റൂമിന് മുന്നിലേക്ക് കൂട്ടിക്കൊണ്ടുപോയി മറ്റു വിദ്യാർത്ഥികളും അദ്ധ്യാപകരും നോക്കിനിൽക്കെയാണ് മുടി മുറിച്ചു മാറ്റിയത്. കഴിഞ്ഞ 19നാണ് സംഭവം.

ഇതിന് ശേഷം നാണക്കേട് മൂലം ഈ വിദ്യാർത്ഥി സ്‌കൂളിൽ പോയിരുന്നില്ല. കഴിഞ്ഞ ദിവസം കോളനിയിൽ സന്ദർശനത്തിന് എത്തിയ എസ്.സി, എസ്.ടി മഹിളാസമഖ്യ ജീവനക്കാർ സ്‌കൂളിൽ പോകാതെ വീട്ടിൽ കഴിയുന്ന കുട്ടിയെ കണ്ടു ചോദിച്ചപ്പോഴാണ് സംഭവം വിവരിച്ചത്. മഹിളാ സംഖ്യ ജീവനക്കാർ അപ്പോൾ തന്നെ വിദ്യാർത്ഥിയെയും കൂട്ടി ചിറ്റാരിക്കൽ പൊലീസ് സ്റ്റേഷനിൽ എത്തി പരാതി നൽകി. വിദ്യാർത്ഥി നൽകിയ പരാതി പ്രകാരം സ്‌കൂൾ പ്രധാന അദ്ധ്യാപിക ഷേർളിയുടെ പേരിൽ എസ്.സി, എസ്.ടി നിയമ പ്രകാരവും ജുവനെൽ ജസ്റ്റിസ് ആക്ട് പ്രകാരവും ചിറ്റാരിക്കൽ പൊലീസ് ജാമ്യമില്ലാ വകുപ്പ് ചുമത്തി കേസെടുത്തു.

കാസർകോട് ഡിവൈ. എസ്.പി സതീഷ് കുമാർ ആലക്കാലിന്റെ നേതൃത്വത്തിൽ കഴിഞ്ഞ ദിവസം തന്നെ സ്‌കൂളിൽ എത്തി അന്വേഷണം നടത്തി. സംഭവം സ്‌കൂൾ അധികൃതർ നിഷേധിച്ചെങ്കിലും വിദ്യാർത്ഥിയുടെ മുറിച്ചുമാറ്റിയ മുടി സ്‌കൂൾ വളപ്പിലെ മാലിന്യ കുഴിയിൽ നിന്ന് അന്വേഷണസംഘം കണ്ടെത്തി. ഇത് തിങ്കളാഴ്ച കോടതിയിൽ ഹാജരാക്കുമെന്ന് സ്‌പെഷ്യൽ മൊബൈൽ സ്‌ക്വാഡ് ഡിവൈ.എസ്. പി എ സതീഷ് കുമാർ പ്രതികരിച്ചു.