ഷാരൂഖ് പമ്പിൽ എത്തിയത് ഓട്ടോയിൽ, മാധ്യമങ്ങളിൽ ചിത്രം കണ്ടപ്പോൾ പ്രതിയെ തിരിച്ചറിഞ്ഞു, നിർണായകമായി ഡ്രൈവറുടെ മൊഴി

കോഴിക്കോട്: തീവണ്ടിലുണ്ടായ ആക്രമണത്തിൽ പ്രതി ഷാരൂഖ് സെയ്ഫി പെട്രോള്‍ വാങ്ങിയ പമ്പ് പോലീസിന്
കണ്ടെത്താനായത് ഓട്ടോ ഡ്രൈവറുടെ മൊഴിയോടെ. പ്രതിയുടെ ചിത്രങ്ങൾ മാധ്യമങ്ങളിൽ വന്നതോടെയാണ് ഓട്ടോ ഡ്രൈവര്‍ ഷാരൂഖ് സെയ്ഫിയെ തിരിച്ചറിഞ്ഞത്. ഷാരൂഖ് ഇയാളുടെ ഓട്ടോയില്‍ക്കയറിയാണ് ഷൊര്‍ണൂരിലെ പമ്പിലെത്തി രണ്ട് കുപ്പികളിലായി പെട്രോള്‍ വാങ്ങി മടങ്ങിയത്.

പ്രതിയെ തിരിച്ചറിഞ്ഞ ഓട്ടോ ഡ്രൈവറായ രാജേഷ് വിവരം സുഹൃത്തിനെ അറിയിച്ചു. തുടര്‍ന്ന് സുഹൃത്താണ് പോലീസിനെ വിവരമറിയിച്ചത്. ഇതോടെ പോലീസ് ഷൊര്‍ണൂരിലെത്തി സി.സി.ടി.വികൾ ഉള്‍പ്പെടെ പരിശോധന നടത്തി വ്യക്തതവരുത്തി. ഓട്ടോ ഡ്രൈവറുടെ മൊഴിയും രേഖപ്പെടുത്തി.

റെയില്‍വേ സ്‌റ്റേഷനില്‍ നിന്ന് പെട്രോള്‍ പമ്പിലേക്ക് ഓട്ടോ വിളിച്ച് പുറപ്പെട്ട ഷാരൂഖ്, പെട്രോള്‍ വാങ്ങിയ ശേഷം അതേ ഓട്ടോയില്‍ത്തന്നെ റെയില്‍വേ സ്‌റ്റേഷനില്‍ തിരികെയെത്തുകയായിരുന്നു. സ്‌റ്റേഷന് അടുത്ത് പാമ്പുണ്ടായിട്ടും പ്രതി അകലെയുള്ള പമ്പിലേക്ക് പോകാനായിരുന്നു ഡ്രൈവറോട് പറഞ്ഞത്. കേരളത്തിൽ ഒരിക്കൽ പോലും മുൻപ് വന്നിട്ടില്ലാത്ത ഇയാൾക്ക് ഷൊർണൂരിലെ പാമ്പിനെക്കുറിച്ചുള്ള വിവരം എങ്ങനെ അറിയാമെന്നതും ദുരൂഹമാണ്.