ബലൂൺ വിഴുങ്ങി, ഒമ്പത് മാസം പ്രായമുള്ള കുഞ്ഞിന് ദാരുണാന്ത്യം

ചെന്നെെ: ഒമ്പത് മാസം പ്രായമുള്ള കുഞ്ഞ് ബലൂൺ വായിൽ പോയതിനെ തുടർന്ന് മരണപ്പെട്ടു. തമിഴ്‌നാട് തിരുച്ചിറപ്പള്ളി സ്വദേശി മുത്തുമണിയുടെ മകൻ എം മഹിഴനാണ് മരിച്ചത്. വീട്ടിൽ കളിക്കുന്നതിനിടെ കുട്ടി ബലൂൺ വിഴുങ്ങുകയായിരുന്നു. ഉടൻ തന്നെ നാമക്കൽ സർക്കാർ ആശുപത്രിയിലെത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

കുട്ടിയുടെ മരണത്തിൽ പൊലീസ് അസ്വാഭാവിക മരണത്തിന് കേസെടുത്തു. കുട്ടിയുടെ മൃതദേഹം ആശുപത്രിയിൽ സൂക്ഷിച്ചിരിക്കുകയാണ്. നടപടി പൂർത്തിയാക്കിയ ശേഷം കുടുംബത്തിന് വിട്ടു നൽകുമെന്ന് പോലീസ് അറിയിച്ചു. അതേസമയം മുലപ്പാൽ തൊണ്ടയിൽ കുടുങ്ങി മൂന്ന് മാസം പ്രായമുള്ള കുഞ്ഞ് മരിച്ചു. തിരുവനന്തപുരം പള്ളിച്ചല്‍ സ്വദേശികളായ ജയകൃഷ്ണന്‍-ജനിമോള്‍ ദമ്പതികളുടെ ഏകമകന്‍ ജിതേഷ് ആണ് മരിച്ചത്.

ഞായറാഴ്ച വൈകീട്ട് കുഞ്ഞിന് മുലപ്പാല്‍ നല്‍കി കിടത്തിയതായിരുന്നു. തിങ്കളാഴ്ച പുലര്‍ച്ചെയായിട്ടും കുഞ്ഞിന് അനക്കമുണ്ടായില്ല. തുടര്‍ന്ന് ബാലരാമപുരത്തെ സ്വകാര്യ ആശുപത്രിയില്‍ എത്തിച്ചു. പള്‍സ് കുറവായതിനാല്‍ അവിടെനിന്നും എസ്‌ഐടി ആശുപത്രിയിലേക്ക് മാറ്റി.

ചികിത്സയിലിരിക്കെ തിങ്കളാഴ്ച വൈകീട്ട് ആറുമണിയോടെയാണ് മരണം സ്ഥിരീകരിച്ചത്. കുഞ്ഞിന്റെ ശ്വാസകോശത്തില്‍ മുലപ്പാല്‍ കുടുങ്ങിയതാണ് മരണകാരണമായി ഡോക്ടര്‍മാര്‍ പറയുന്നത്.