ദുരിതാശ്വാസ നിധിയിൽ നിന്ന് പണം തട്ടിയവർ ദയ അർഹിക്കുന്നില്ല, പൊട്ടിക്കരഞ്ഞ് ബീഡി തൊഴിലാളി

കണ്ണൂർ: മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് പണം തട്ടിയവർ യാതൊരു വിധത്തിലുള്ള ദയയും അർഹിക്കുന്നില്ലെന്ന് കണ്ണൂരിലെ ബീഡി തൊഴിലാളി ജനാർദ്ദനൻ. തന്റെ സമ്പാദ്യത്തിന്റെ ഭൂരിഭാഗവും ദുരിതാശ്വാസ നിധിയിലേക്ക് സംഭാവന ചെയ്ത ആളാണ് ജനാർദ്ദനൻ. ആലോചിക്കുമ്പോൾ തന്നെ ചത്താൽ മതി എന്ന് തോന്നിപ്പോകുന്നുവെന്നും അദ്ദേഹം പറഞ്ഞു.

മുഖ്യമന്ത്രിയുടെ ദുരിതാശ്വാസ നിധിയിൽ കൈയിട്ടു വാരിയവരുടെ രാഷ്ട്രീയം നോക്കിയിട്ട് കാര്യം ഇല്ലെന്നും തെറ്റ് ചെയ്തിട്ടുണ്ടെങ്കിൽ തെറ്റിനെ വിമർശിക്കണമെന്നും ജനാർദ്ദനൻ പറഞ്ഞു. ആ സമയത്ത് തന്റെ കാര്യം മാത്രം നോക്കി പൈസയും കൈയ്യിൽ വെച്ച് തനിക്ക് ഇരിക്കാമായിരുന്നുവെന്നും അദ്ദേഹം കൂട്ടിച്ചേർത്തു.

‘കൊറോണ വന്നത് രാഷ്ട്രീയം നോക്കിയിട്ടാണോ? വലിയ കോടീശ്വരന്മാർ വരെ കൊറോണ വന്ന് മരിച്ചിട്ടില്ലേ? അവർ പോകുമ്പോൾ കോടികളും കൊണ്ടാണോ പോയത്. മനുഷ്യന്മാർക്ക് ഇതെങ്ങനെ കഴിയുന്നു. ഇപ്പോൾ ആലോചിക്കുമ്പോൾ ചത്താ മതി എന്ന് തോന്നിപ്പോകും. തട്ടിപ്പ് നടത്തിയവർ ഒരു വിധത്തിലും ദയയും അർഹിക്കുന്നില്ല’, ജനാർദനൻ കൂട്ടിച്ചേർത്തു. രണ്ട് ലക്ഷം രൂപയാണ് മുഖ്യമന്ത്രിയുടെ വാക്‌സിൻ ചലഞ്ചിലേക്ക് ജനാർദ്ദനൻ നൽകിയത്. ഓക്‌സിജൻ കിട്ടാതെ ആളുകൾ മരിക്കുന്ന സമയത്ത് മരുന്നിന് വിലയിട്ടതറിഞ്ഞായിരുന്നു തുക സംഭാവന നൽകിയത്. ബീഡി തെറുത്ത് കിട്ടിയ തുക ആയിരുന്നു ഇത്. ജനാർദ്ദനൻ സംഭാവന നൽകിയത് വലിയ രീതിയിൽ ചർച്ച ആയിരുന്നു. ഇതിന് പിന്നാലെ രണ്ടാം പിണറായി സർക്കാരിന്റെ സത്യപ്രതിജ്ഞാ ചടങ്ങിലേക്ക് അദ്ദേഹത്തെ ക്ഷണിക്കുകയും ചെയ്തിരുന്നു.