“ഞാനൊരു യഥാർഥ കമ്യൂണിസ്റ്റുകാരനാണ്” – മുഖ്യമന്ത്രിയുടെ ദുരിതാശ്വാസ നിധിയിലേക്ക് രണ്ട് ലക്ഷം രൂപ സംഭാവന നൽകിയ വയോധികൻ ഇവിടെയുണ്ട്

മുഖ്യമന്ത്രിയുടെ ദുരിതാശ്വാസ നിധിയിലേക്ക് രണ്ട് ലക്ഷം രൂപ സംഭാവന നൽകിയ ബീഡി തൊഴിലാളി കണ്ണൂർ അവേര സ്വദേശി ജനാർദനനാണ്. എല്ലാവർക്കും ഇതൊരു പ്രചോദനമാകുമെങ്കിൽ താൻ ഹാപ്പിയാണെന്നാണ് ജനാർദനൻ പറയുന്നത്.

ഞാനൊരു യഥാർഥ കമ്യൂണിസ്റ്റുകാരനാണ്. കമ്യൂണിസ്റ്റുകാരൻ എന്നു പറയുമ്പോൾ നൂറുശതമാനം കമ്യൂണിസ്റ്റ് ആയിട്ടില്ല. അമ്പതു ശതമാനമേ ആയിട്ടുള്ളൂ- ജനാർദൻ പറഞ്ഞു. അതെന്താ കുറവ് എന്ന ചോദ്യത്തിന് -ഒരു കമ്യൂണിസ്റ്റുകാരൻ എന്നു പറയുമ്പോൾ സ്വന്തം ജീവൻ തന്നെ പാർട്ടിക്കു വേണ്ടി ദാനം ചെയ്യണം എന്ന കാഴ്ചപ്പാടാണുള്ളത്. പക്ഷെ ഞാൻ ജീവനൊന്നും കൊടുത്തിട്ടില്ല. എനിക്ക് അതിനുള്ള സാഹചര്യം ഒന്നും ഉണ്ടായിട്ടില്ല. ജീവൻ കൊടുക്കാൻ വേണ്ടിയുള്ള അവസരം ഉണ്ടായാൽ ഞാൻ എന്റെ ജീവൻ പാർട്ടിക്കു വേണ്ടി കൊടുക്കും. പാർട്ടിയോട് അത്രയും കൂറുണ്ട്. സംഭാവന നൽകുന്ന കാര്യത്തിൽ മക്കളിൽനിന്ന് പിന്തുണ ലഭിച്ചതായും അദ്ദേഹം കൂട്ടിച്ചേർത്തു.

12 വയസ്സുമുതൽ ബീഡി തൊഴിലാളിയാണ് ജനാർദനൻ. കൊവിഡ് വാക്സിന്റെ വിലവർധനവിനെ കുറിച്ചുള്ള വാർത്ത ജനാർദനന്റെ മനസുലച്ചു. തുടർന്നാണ് ഇത്തരത്തിലൊരു തീരുമാനമെടുക്കുന്നത്. ‘പൈസ കുന്നുകൂട്ടിവച്ചിട്ട് കാര്യമുണ്ടോ ? ആവശ്യങ്ങൾക്ക് ഉപയോ​ഗിക്കുകയല്ലേ വേണ്ടത്’- ജനാർദനൻ ചോദിക്കുന്നു.

ജനാർദനന്റെ ബാങ്ക് ബാലൻസായി ഇനിയുള്ളത് കേവലം 850 രൂപ മാത്രമാണ്. പക്ഷെ ജീവിക്കാൻ ഉള്ളത് ഇനിയുള്ള കാലം വീട്ടിലിരുന്ന് അധ്വാനിച്ചുണ്ടാക്കുമെന്നു ഉറപ്പുണ്ട് ഈ മനുഷ്യന്. പരിമിതമായ സഹചര്യങ്ങളിലാണ് ജീവിതം. ഭാര്യ കൂടെയില്ലെന്ന വേദന മാത്രമാണ് ജനാർദനന്. പരിമിതികൾക്കിടയിലും ജനാർദനൻ സംതൃപ്തനാണ്.