പത്തനാപുരത്ത് മത്സരിച്ചത് ബിജെപിയുടെ നിർബന്ധം മൂലം, ഇനി രാഷ്ട്രീയത്തിലേക്കില്ല- ഭീമൻ രഘു

ജയന്റെ പെട്ടന്നുള്ള മരണത്തിനു ശേഷം അദ്ദേഹത്തിൻറെ പകരക്കാരനായി വെള്ളിത്തിരയിൽ എത്തിയ നടനാണ്‌ ഭീമൻ രഘു. ആദ്യമായി നായകനായ ഭീമൻ എന്ന ചിത്രത്തിൽ നിന്നാണ്‌ അദ്ദേഹത്തിന് ഭീമൻ രഘു എന്ന പേര് ലഭിച്ചത്. അടുത്തിടെ നടൻ രാഷ്ട്രീയത്തിലേക്ക് പ്രവേശിച്ചിരുന്നു. ഇപ്പോളിതാ താൻ സജീവ രാഷ്ട്രീയം അവസാനിപ്പിച്ചെന്ന് പറയുകയാണ് താരം.

ഒരിക്കലും രാഷ്ട്രീയക്കാരനായിരുന്നില്ല. തനിക്ക് രാഷ്ട്രീയം മടുത്തു. പത്തനാപുരത്ത് സിനിമ നടൻമാർ മത്സരിക്കാനിറങ്ങിയപ്പോഴാണ് താനും ബിജെപി സ്ഥാനാർത്ഥിയായ മത്സര രംഗത്തിനിറങ്ങിയത്. ഗണേഷ്‌കുമാറും ജഗദീഷും മത്സരിച്ചപ്പോൾ തന്നോടും മത്സരിക്കാൻ ബിജെപി നിർബന്ധിക്കുകയായിരുന്നു

തെരഞ്ഞെടുപ്പ് രാഷ്ട്രീയത്തോട് ഗുഡ് ബൈ പറയുകയാണ്. തെരഞ്ഞെടുപ്പിനു ശേഷം ബിജെപിയുമായി ബന്ധം പുലർത്തിയിട്ടില്ല. തനിക്ക് എല്ലാ രാഷ്ട്രീയ പാർട്ടികളിലെ നേതാക്കളുമായും ബന്ധമുണ്ട്. എല്ലാവരെയും വേണമെന്ന നിലപാടാണ് സ്വീകരിക്കുന്നത്. മുഖ്യമന്ത്രി പിണറായി വിജയനെ പലതവണ സന്ദർശിച്ചിട്ടുണ്ട്. അദ്ദേഹവുമായി അടുപ്പവുമുണ്ട്. തന്റെ മകളുടെ വിവാഹത്തിന് പിണറായിയെ ക്ഷണിച്ചിട്ടുണ്ട്.

നാടിന് വേണ്ടിയാണ് മുഖ്യമന്ത്രി പ്രവർത്തിക്കുന്നത്. അതുകൊണ്ടു തന്നെ ഇത്തരം വിമർശനങ്ങൾ സ്വാഭാവികമാണ്. പ്രധാനമന്ത്രി നരേന്ദ്ര മോദിയെയും താൻ ഇഷ്ടപ്പെടുന്നു. അവസരം കിട്ടിയാൽ അദ്ദേഹത്തെ സന്ദർശിക്കും. മോദി രാജ്യത്തിനായി പല നല്ല കാര്യങ്ങളും ചെയ്യുന്നുണ്ട്. ആലപ്പുഴയിലെ കോളേജ് വിദ്യാഭ്യാസകാലത്ത് താൻ ഇടതുപക്ഷ അനുഭാവിയായിരുന്നു. അന്ന് സമരം ചെയ്തു കോളേജ് പൂട്ടിച്ചിട്ടുണ്ട്. ഇന്നത്തെ പല നേതാക്കൻമാരും തന്റെ കൂടെ കോളേജിൽ പഠിച്ചവരാണ്. അവരൊക്കെയായി നല്ല ബന്ധം കാത്തു സൂക്ഷിക്കുന്നുണ്ട്