അമേരിക്കൻ പ്രസിഡന്റ് ജോ ബൈഡനേയും ഭാര്യയേയും സുരക്ഷിത കേന്ദ്രത്തിലേക്ക് മാറ്റി

അമേരിക്കൻ പ്രസിഡന്റ് ജോ ബൈഡനേയും ഭാര്യയേയും സുരക്ഷാ ഭീഷണി കണക്കിലെടുത്ത് ഉദ്യോഗസ്ഥർ സുരക്ഷിത കേന്ദ്രത്തിലേക്ക് മാറ്റി. നിയന്ത്രിത വ്യോമാതിർത്തിയിൽ ചെറിയ സ്വകാര്യ വിമാനം തെറ്റായി പ്രവേശിച്ചതോടെയാണ് പ്രസിഡന്റിനെയും പ്രഥമ വനിതയെയും സുരക്ഷാ ഉദ്യോഗസ്ഥർ സുരക്ഷിത കേന്ദ്രത്തിലേക്ക് മാറ്റിയത്. റെഹോബോത്ത് ബീച്ചിൽ അവധിക്കാലം ചെലവഴിക്കാനെത്തിയതായിരുന്നു ബൈഡൻ.

ബൈഡന്റെ ബീച്ച് ടൗൺ സന്ദർശനത്തിന് മുമ്പ് ഫെഡറൽ ഏവിയേഷൻ അഡ്മിനിസ്‌ട്രേഷൻ ഫ്‌ളൈറ്റ് നിയന്ത്രണങ്ങൾ പ്രസിദ്ധീകരിച്ചിരുന്നു. എന്നിട്ടും സുരക്ഷാ മേഖലയിൽ വിമാനം പറത്തിയതിനെ കുറിച്ച് അന്വേഷണം ആരംഭിച്ചിട്ടുണ്ട്. നിയന്ത്രിത വ്യോമമേഖലയിൽ പ്രവേശിച്ച വിമാനം വളരെ വേഗം തിരികെ പോയതോടെയാണ് ആശങ്ക അവസാനിച്ചത്. പ്രസിഡന്റ് താമസിക്കുന്ന വസതിയുടെ 10 മൈൽ റേഡിയസ് നോഫ്‌ളൈ സോണും 30 മൈൽ നിയന്ത്രിത മേഖലയുമായി നിജപ്പെടുത്തിയിട്ടുണ്ട്.

മാർഗനിർദേശങ്ങൾ പാലിക്കാത്ത പൈലറ്റിനെ ഇതിനായി ചോദ്യം ചെയ്യലിന് വിധേയമാക്കും. മിക്ക സംഭവങ്ങളിലും പിഴ ഈടാക്കി വിട്ടയക്കുകയോ ക്രിമിനൽ കേസ് രജിസ്റ്റർ ചെയ്യുകയോ ചെയ്യും. നിയന്ത്രണങ്ങൾ ലംഘിക്കുന്ന വിമാനങ്ങളെ തടയാൻ യുഎസ് മിലിട്ടറി ജെറ്റുകളും കോസ്റ്റ് ഗാർഡ് ഹെലികോപ്ടറുകളുമാണ് സാധാരണ ഉപയോഗിക്കുന്നത്. ഇവ അതിക്രമിച്ച് കയറിയ വിമാനങ്ങളെ അടുത്തുള്ള എയർഫീൽഡിലേക്ക് എത്തിക്കുകയും പൈലറ്റിനെ ചോദ്യം ചെയ്യുകയുമാണ് പതിവ് രീതി.