നാസയുടെ ചൊവ്വാ ദൗത്യവിജയത്തിൽ ഇന്ത്യൻ വംശജരെ അനുമോദിച്ചു ബൈഡൻ

നാസയുടെ സമീപകാലത്തെ ചൊവ്വാ ദൗത്യവിജയത്തിൽ ഇന്ത്യൻ വംശജരെ അനുമോദിച്ചു അമേരിക്കൻ പ്രസിഡന്റ് ജോ ബൈഡൻ. നാസയുടെ പെർസെവിറസൻസ് ദൗത്യത്തിന്റെ മേധാവി ഇന്ത്യൻ വംശജയായ ഡോ.സ്വാതി മോഹനായിരുന്നു. ഡോ.സ്വാതി മോഹനുമായി വീഡിയോ കോൺഫറൻസ് വഴി സംസാരിച്ച പ്രസിഡന്റ് ജോ ബൈഡൻ രാജ്യത്തിന് ഇന്ത്യൻ വംശജർ നൽകുന്ന പ്രാധാന്യത്തെ എടുത്തുപറഞ്ഞു. രാജ്യത്തെ എല്ലാ മേഖലയിലും ഇന്ത്യൻ വംശജർ നൽകിക്കൊണ്ടിരിക്കുന്ന സേവനം സമാനതകളില്ലാത്തതാണെന്നും ബൈഡൻ കൂട്ടിച്ചേർത്തു.

‘ ഇതൊരു മഹത്തായ നേട്ടമാണ്. ഇന്ത്യൻ വംശജരെല്ലാം അമേരിക്കയുടെ എല്ലാ ദൗത്യങ്ങളും സ്വയം ഏറ്റെടുത്തിരിക്കുന്നു. നാസയുടെ തലപ്പത്തിരിക്കുന്ന ഡോ. സ്വാതി, എന്റെ സഹപ്രവർത്തകയായ വൈസ് പ്രസിഡന്റ് കമലാ ഹാരിസ്, എന്റെ പ്രസംഗം തയ്യാറാക്കുന്ന വിനയ് റെഡ്ഡി, തുടങ്ങി നിരവധി പേർ ഇന്ന് അമേരിക്കയുടെ കരുത്താണ്. ഭാവി അമേരിക്കൻ തലമുറയ്ക്ക് ഇന്ത്യൻ വനിതാ ശാസ്ത്രജ്ഞർ നൽകുന്നത് അതുല്യമായ സംഭാവനയും പ്രതീക്ഷയുമാണ്. താനേറെ സന്തോഷവാനാണ്.’ ജോ ബൈഡൻ അഭിമുഖ സംഭാഷണത്തിൽ പറഞ്ഞു.

ഡോ. സ്വാതി മോഹന്റെ നേതൃത്വത്തിൽ നാസയുടെ കാലിഫോർണിയ ഇൻസ്റ്റിറ്റ്യൂട്ട് ഓഫ് ടെക്‌നോളജിയുടെ ജെറ്റ് പ്രൊപ്പൽഷൺ ലാബോറട്ടറിയാണ് എല്ലാ മുന്നൊരുക്കവും നടത്തി ചൊവ്വാ ദൗത്യം വിജയിപ്പിച്ചത്. അതീവ ദുർഘടമായ ചൊവ്വാഗ്രഹ പര്യവേക്ഷണ വാഹനമായ പെർസെവറൻസ് ദൗത്യം ഒരു പിഴവുമില്ലാതെയാണ് പൂർത്തിയാക്കിയത്.