ബിഗ് ബേസ് സീസൺ 5 കപ്പുയർത്തി സംവിധായകൻ അഖിൽ മാരാർ വിജയി; റനീഷ റണ്ണറപ്പ്

ഏഷ്യാനെറ്റിലെ ബിഗ് ബോസ് മലയാളം സീസൺ അഞ്ചിന്റെ കപ്പുയർത്തി സംവിധായകൻ അഖിൽ മാരാർ. ബിഗ് ബോസിൽ സാബുമോൻ, മണിക്കുട്ടൻ, ദിൽഷ പ്രസന്നൻ എന്നിവർക്കു ശേഷം നാലാമത് കപ്പുയർത്തുന്ന മത്സരാർത്ഥിയാണ് അഖിൽ . വിജയിയെ കാത്തിരിക്കുന്നത് 50 ലക്ഷം രൂപയാണ്. ഫസ്റ്റ് റണ്ണറപ്പ് ആയി റനീഷയും സെക്കന്റ് റണ്ണറപ്പ് ആയി ജുനൈസ് വിപിയും തിരഞ്ഞെടുക്കപ്പെട്ടു.

നാലാം സ്ഥാനം ശോഭ വിശ്വനാഥും അഞ്ചാം സ്ഥാനം ഷിജു എആറും നേടി. ഫിനാലെയുടെ തലേദിവസം സ്‌പോട്ട് എവിക്ഷനിലൂടെ പുറത്തായ സെറീന ആൻ ജോൺസൺ ആണ് ആറാം സ്ഥാനം സ്വന്തമാക്കിയത്. 21 മത്സരാർത്ഥികളാണ് ഇത്തവണ ബിഗ് ബോസ് സീസണിൽ മാറ്റുരച്ചത്.

ഗ്രാന്റ് ഫിനാലെ ആരംഭിച്ച് ആദ്യം പുറത്തായത് നടൻ ഷിജുവായിരുന്നു. പിന്നീട് പുറത്തായത് സംരംഭകയായ ശോഭ വിശ്വനാഥായിരുന്നു. മ്യൂസിഷ്യൻ സ്റ്റീഫൻ ദേവസ്സിയാണ് കണ്ണുകെട്ടി ശോഭയെ ബിഗ് ബോസ് ഹൗസിൽ നിന്നും പുറത്തേക്ക് കൊണ്ടുവന്നത്. നാലാമതായാണ് ബിഗ് ബോസ് ഹൗസിൽ നിന്നും ശോഭ പുറത്തായത്. ശോഭ കിരീടം ഉയർത്തുമെന്നാണ് ചിലർ വിശ്വസിച്ചിരുന്നത്. അവരുടെ പ്രതീക്ഷകൾ അസ്തമിപ്പിച്ചുകൊണ്ടാണ് ശോഭ പുറത്തായിരിക്കുന്നത്.

ബിഗ് ബോസ് വീട്ടിലെ ടോം ആൻഡ് ജെറി എന്ന് പ്രേക്ഷകർക്കിടയിൽ അറിയപ്പെട്ട കോമ്പോയാണ് അഖിൽ മാരാരും ശോഭ വിശ്വനാഥും. ഇരുവരും തമ്മിലുള്ള പോരാട്ടം ഷോയ്ക്ക് വീര്യം പകർന്നിരുന്നു. ബിഗ് ബോസ് വീട്ടിൽ നിന്ന് ഇറങ്ങും മുൻപ് പരസ്പരം കൈകൊടുത്തും സംസാരിച്ചും ആലിംഗനം ചെയ്തും പിണക്കങ്ങൾ ശോഭയും അഖിലും പറഞ്ഞുതീർത്തിരുന്നു.