ഒരിടത്തിരുന്ന് പരസ്പരം കല്ലെറിയുന്നു, മറ്റൊരിടത്ത് ഒത്തുകൂടി അത്താഴം കഴിക്കുന്നു, സിപിഎമ്മിനും കോൺഗ്രസിനുമെതിരെ രൂക്ഷ വിമർശനവുമായി ബിജെപി നേതാവ് അഗ്നിമിത്ര പോൾ

ബെംഗളൂരു: സിപിഎമ്മിനും കോൺഗ്രസിനുമൊപ്പം വേദി പങ്കിട്ട തൃണമൂൽ കോൺഗ്രസനെതിരെ രൂക്ഷ വിമർശനവുമായി ബിജെപി നേതാവ് അഗ്നിമിത്ര പോൾ. സിപിഎമ്മും കോൺഗ്രസും ഒരു പ്രത്യയശാസ്ത്രവുമില്ലാത്ത പാർട്ടികളാണെന്ന് പശ്ചിമ ബംഗാൾ എംഎൽഎയും ജനറൽ സെക്രട്ടറിയുമായ അഗ്‌നിമിത്ര പോൾ പറഞ്ഞു. ബെംഗളൂരുവിൽ സംഘടിപ്പിച്ച പ്രതിപക്ഷ പാർട്ടികളുടെ യോഗത്തിന്റെ പശ്ചാത്തലത്തിലാണ് അഗ്നിമിത്രയുടെ പരാമർശം.

പശ്ചിമ ബംഗാളിലും കേരളത്തിലും പരസ്പരം എതിർക്കുന്നവരാണ് കോൺഗ്രസ് പാർട്ടിയും മാർക്സിസ്റ്റും. എന്നാൽ ഇതേ ആൾക്കാർ ബെംഗളൂരുവിൽ ഒരുമിച്ചിരുന്ന് അത്താഴം കഴിക്കുന്നു. കോൺഗ്രസ്, സിപിഎം പ്രവർത്തകരെ മമത ബാനർജി കൊന്നുവെന്നായിരുന്നു പശ്ചിമ ബംഗാളിൽ അവർ ടിഎംസിക്കെതിരെ ആക്രോശിച്ചത്. ഇതിന് പിന്നാലെ ഒന്നിച്ചിരുന്ന് അത്താഴം കഴിക്കുന്ന ഇക്കൂട്ടർ പശ്ചിമ ബംഗാളിൽ കൊല്ലപ്പെട്ട സിപിഎം സഖാക്കൾക്കും കോൺഗ്രസ് പ്രവർത്തകർക്കും എന്ത് മറുപടിയാണ് നൽകുകയെന്ന് അഗ്‌നിമിത്ര ചോദിച്ചു.

ഒരിടത്ത് പരസ്പരം ആക്രോശിച്ച് മറ്റൊരിടത്ത് ഒരുമിച്ചിരുന്ന് അത്താഴം കഴിക്കുന്ന ഇവർ ഗഡ്ബന്ധനെക്കുറിച്ചാണ് ചർച്ച ചെയ്യുന്നത്. പ്രത്യയശാസ്ത്രപരമായി ഒരു നിലപാടുമില്ലാത്ത പാർട്ടികളാണ് സിപിഎമ്മും കോൺഗ്രസും. സിപിഎമ്മിനും കോൺഗ്രസിനും ടിഎംസിക്കും അൽപമെങ്കിലും നാണമുണ്ടോയെന്നും അഗ്‌നിമിത്ര ചോദിച്ചു.