പ്രധാനമന്ത്രി നരേന്ദ്രമോദിയുടെ കടുത്ത ആരാധികയാണ് താന്‍, ബിജെപിയുടെ മുസ്ലീം സ്ഥാനാര്‍ത്ഥി സുല്‍ഫത്ത് പറയുന്നു

സംസ്ഥാനത്ത് തെരഞ്ഞെടുപ്പ് ആവേശമാണ്. മുന്നണിങ്ങള്‍ തങ്ങളുടെ സ്ഥാനാര്‍ത്ഥികളെ പ്രഖ്യാപിച്ച് പ്രചരണവും ആരംഭിച്ചു കഴിഞ്ഞു. പാര്‍ട്ടികള്‍ പലരും യുവ സ്ഥാനാര്‍ത്ഥികള്‍ക്ക് അവസരം നല്‍കുമ്പോള്‍ ന്യൂനപക്ഷ വിഭാഗങ്ങളില്‍ നിന്നുമുള്ള സ്ഥാനാര്‍ത്ഥികള്‍ക്കാണ് ബിജെപി അവസരം നല്‍കുന്നത്. മലപ്പുറം ജില്ലയിലാണ് ന്യൂനപക്ഷ വിഭാഗത്തില്‍ നിന്നുമുള്ള വനിതകളെ ബിജെപി സ്ഥാനാര്‍ത്ഥികളാക്കിയിരിക്കുന്നത്. വണ്ടൂര്‍ ഗ്രാമപഞ്ചായത്തിന്റെ ആറാം വാര്‍ഡില്‍ ടി പി സുല്‍ഫത്താണ് സ്ഥാനാര്‍ത്ഥി. ഇതോടെ ഈ മണ്ടലം ഏറെ ശ്രദ്ധേയമാവുകയാണ്.

ടിപി സുല്‍ഫത്ത് മത്സരിക്കുന്നത് താമര ചിഹ്നത്തില്‍ ബിജെപി സ്ഥാനാര്‍ത്ഥിയായിട്ടാണ്.വണ്ടൂരിലെ പ്രധാന കുടുംബത്തില്‍ നിന്നുളള അംഗമായതുകൊണ്ട് രാഷ്ട്രീയ പ്രവേശത്തില്‍ ചില്ലറ എതിര്‍പ്പൊക്കെ ആദ്യം വന്നെങ്കിലും ഇപ്പോള്‍ എല്ലാം ശരിയായെന്ന് സ്ഥാനാര്‍ഥി തന്നെ തുറന്ന് പറയുകയാണ്. മുത്തലാഖ്,വിവാഹപ്രായം ഉയര്‍ത്തല്‍ തുടങ്ങിയ കേന്ദ്ര നിയമങ്ങളാണ് ബി.ജെ.പിയുമായി അടുപ്പിച്ചതെന്ന് പത്താംക്ലാസില്‍ പഠിക്കുബോള്‍ വിവാഹിതയായ സുല്‍ഫത്ത് പറയുന്നു.

പ്രധാനമന്ത്രി നരേന്ദ്രമോദിയുടെ കടുത്ത ആരാധികയാണന്നും സ്ഥാനാര്‍ഥി വോട്ടര്‍മാര്‍ക്കു മുന്‍പില്‍ നയം വ്യക്തമാക്കുന്നു. സുല്‍ഫത്തിന്റെ ഭര്‍ത്താവ് വിദേശത്താണ്. പ്രവാസിയായ ഭര്‍ത്താവും മക്കളും പൂര്‍ണ പിന്തുണ അറിയിച്ച് ഒപ്പം തന്നെ ഉണ്ടെന്നാണ് സുല്‍ഫത്ത് പറയുന്നത്. സുല്‍ഫത്ത് കൂടി സ്ഥാനാര്‍ത്ഥി ആയി മത്സര രംഗത്ത് എത്തിയതോടെ ആറാം വാര്‍ഡ് പോരാട്ടത്തിന്റെ സ്വഭാവം തന്നെ മാറിയിരിക്കുകയാണ്.