അമൃത്‌സറിൽ സുവർണ ക്ഷേത്രത്തിന് സമീപം സ്ഫോടനം, നിരവധി പേർക്ക് പരിക്ക്

അമൃത്‌സർ. പഞ്ചാബിലെ അമൃത്‌സറിൽ സുവർണ ക്ഷേത്രത്തിൽനിന്ന് ഒരുകിലോമീറ്റർ അകലെ സ്ഫോടനം. ശനിയാഴ്ച രാത്രിയാണ് സ്ഫോടനമുണ്ടായത്. സംഭവത്തിൽ ആറുപേർക്ക് പരുക്കേറ്റതായി പൊലീസ് പറയുന്നു.

ശനിയാഴ്ച രാത്രി, പൊടുന്നനെയുണ്ടായ സ്ഫോടനത്തെത്തുടർന്ന് ഗോൾഡൻ ടെമ്പിൾ ഹെറിറ്റേജ് സ്ട്രീറ്റിന് സമീപമുള്ള താമസക്കാരും സന്ദർശകരും പരിഭ്രാന്തിയിലായി. അർദ്ധരാത്രിയോടെയാണ് സംഭവം നടന്നത്, നിരവധി പേർക്ക് പരിക്കേറ്റു.

സരഗർഹി സറായിക്ക് മുന്നിലുള്ള പാർക്കിംഗ് സ്ഥലത്തിന് സമീപമാണ് സ്ഫോടനം നടന്നത്. സ്‌ഫോടനത്തിന്റെ ആഘാതത്തിൽ സമീപത്തെ റസ്‌റ്റോറന്റിന്റെയും സാരഗർഹി സരായിന്റെയും ജനൽ ചില്ലുകൾ തകർന്നു, കാൽനടയാത്രക്കാർക്ക് പരിക്കേറ്റു.

സംഭവസമയത്ത് സ്‌ഫോടനം നടന്ന സ്ഥലത്തിന് സമീപം ഓട്ടോറിക്ഷയിലുണ്ടാ യിരുന്ന ആറോളം പെൺകുട്ടികൾക്ക് ചില്ല് ചില്ലുകൾ തട്ടി നിസാര പരിക്കുകളേറ്റ തായി ഒരു ദേശീയ മാധ്യമം റിപ്പോർട്ട് ചെയ്തു. സ്‌ഫോടനത്തിന് പിന്നിലെ കൃത്യമായ കാരണം ഫോറൻസിക് സംഘം പരിശോധിച്ച് വരികയാണെന്ന് അഡീഷണൽ ഡെപ്യൂട്ടി പോലീസ് കമ്മീഷണർ ഡോ.മെഹ്താബ് സിംഗ് പറഞ്ഞു.

ജനൽ പാളികൾക്ക് മാത്രമാണ് കേടുപാടുകൾ സംഭവിച്ചതെന്നും കെട്ടിടങ്ങൾക്ക് കേടുപാടുകൾ സംഭവിച്ചിട്ടില്ലെന്നും അദ്ദേഹം സ്ഥിരീകരിച്ചു. ഫൊറൻസിക് സംഘം സ്ഥലത്തെത്തി പരിശോധന നടത്തി. അന്വേഷണം പുരോഗമിക്കുകയാണെന്നും പരിഭ്രാന്തരാകേണ്ടതില്ലെന്നും അമൃത്‌സർ പൊലീസ് കമ്മിഷണർ ട്വീറ്റ് ചെയ്തു.