മൃതദേഹഭാഗങ്ങള്‍ കണ്ടെത്തി; മരങ്ങള്‍ക്കിടയില്‍ കുഴിച്ചിട്ട നിലയില്‍

പത്തനംതിട്ട. ഇലന്തൂരില്‍ ധനസമ്പാദനത്തിനായി നരബലി നടത്തി കൊലപ്പെടുത്തിയ സ്ത്രീകളുടെ മൃതദേഹത്തിന്റെ ഭാഗങ്ങള്‍ കണ്ടെത്തി. പ്രതി ഭഗവല്‍ സിങ്ങിന്റെ വീടിനോട് ചേര്‍ന്ന് മരങ്ങള്‍ക്കിടയിലാണ് മൃതദേഹം കുഴിച്ചിട്ടത്. ഉന്നത് പോലീസ് ഉദ്യോഗസ്ഥരുടെയും റവന്യൂ ഉദ്യോഗസ്ഥരുടെയും നേതൃത്വത്തിലാണ് പരിശോധന നടത്തിയത്.

ഫൊറന്‍സിക് ഉദ്യോഗസ്ഥരും സ്ഥലത്തുണ്ട്. രണ്ട് സ്ത്രീകളെയും കഴുത്തറുത്ത് ശരീരം കഷണങ്ങളാക്കി കുഴിച്ചിടുകയായിരുന്നുവെന്ന് കമ്മീഷണര്‍ പറഞ്ഞു. കൂടുതല്‍ പേര്‍ ഇരകളായിട്ടുണ്ടോ എന്ന് അന്വേഷിക്കും.

നിര്‍ധനരായ ലോട്ടറി വില്‍പ്പന തൊഴിലാളികളായ സ്ത്രീകള്‍ക്ക് 10 ലക്ഷം പ്രതിഫലം വാഗ്ദാനം ചെയ്ത് നീലച്ചിത്രത്തില്‍ അഭിനയിപ്പിക്കാമെന്ന് പറഞ്ഞാണ് പെരുമ്പാവൂരുകാരനായ ഷാഫി തിരുവല്ലക്ക് കൂട്ടിക്കൊണ്ടുപോകുന്നത്. നീലച്ചിത്രത്തില്‍ അഭിനയിച്ചാല്‍ പത്ത് ലക്ഷം രൂപ നല്‍കാമെന്നാണ് ഷാഫി ഇവരോട് പറഞ്ഞിരുന്നത്.

തിരുവല്ലയിലെ വീട്ടിലെത്തിച്ച ഇവരെ കട്ടിലില്‍ കിടത്തി, കൈകാലുകള്‍ കട്ടിലില്‍ കെട്ടിയിട്ടു. സിനിമയുടെ ചിത്രീകരണം എന്ന് വിശ്വസിപ്പിച്ചായിരുന്നു ഇങ്ങനെ ചെയ്യുന്നത്. ഈ സമയത്ത് വൈദ്യന്‍ ഭഗവല്‍ സിംഗ് ചുറ്റിക കൊണ്ട് സ്ത്രീകളുടെ തലക്കടിച്ച് അര്‍ധ ബോധാവസ്ഥയിലാക്കി.

ഇതേ കട്ടിലില്‍ വെച്ച് കഴുത്തറുത്താണ് ഇരുവരെയും കൊലപ്പെടുത്തുന്നത്. ആദ്യം കഴുത്തറത്തത് ഭഗവല്‍ സിംഗിന്റെ ഭാര്യ ലൈലയാണെന്നാണ് പുറത്ത് വന്നിരിക്കുന്ന വിവരം. സിദ്ധനായി കൊലപാതകം നടക്കുമ്പോള്‍ സ്ഥലത്തുണ്ടായിരുന്നത് ഷാഫി എന്ന റഷീദായിരുന്നു. ഒരു രാത്രി മുഴുവന്‍ ഇരകളുടെ ശരീരത്തിലും രഹസ്യ ഭാഗത്തും മുറിവേല്‍പ്പിക്കുകയും ക്രൂരമായി പീഡിപ്പിക്കുകയും ചെയ്ത ശേഷമാണ് മൃതദേഹം കഷണങ്ങളാക്കി കുഴിച്ചുമൂടുന്നത്.