പ്രസവിച്ചയുടൻ കുട്ടിയെ ശ്വാസം മുട്ടിച്ച് കൊലപ്പെടുത്തി വീട്ടുമുറ്റത്ത് കുഴിച്ചിട്ടു, മാതാവിന് ജീവപര്യന്തം കഠിന തടവ്

കൊല്ലം: പ്രസവിച്ചയുടൻ കുഞ്ഞിനെ ശ്വാസംമുട്ടിച്ച് കൊലപ്പെടുത്തി വീട്ടുമുറ്റത്ത് കുഴിച്ചിട്ട സംഭവത്തിൽ മാതാവിന് ജീവപര്യന്തം കഠിന തടവും ഒരുലക്ഷം രൂപ പിഴയും വിധിച്ചു. പുത്തൂർ സ്വദേശിനി അമ്പിളിയെയാണ് കൊല്ലം ഫസ്റ്റ് ക്ലാസ് അഡീഷണൽ സെഷൻസ് കോടതി ശിക്ഷിച്ചത്. പ്രതിയായിരുന്ന ഭർത്താവ് മഹേഷിനെ കോടതി വെറുതെ വിട്ടു.

2018ലാണ് കേസ്നാസ്പദമായ സംഭവം നടന്നത്. മഹേഷിനും അമ്പിളിക്കും രണ്ടര വയസുള്ള കുട്ടിയുണ്ടായിരുന്നു. ഇതിനിടയിൽ അമ്പിളി വീണ്ടും ​ഗർഭിണി ആയി. ​സ്വകാര്യ ആശുപത്രിയിൽ ​ഗർഭഛിദ്രത്തിന് ശ്രമിച്ചെങ്കിലും നടന്നില്ല. തുടർന്ന് ഭർത്താവ് നൽകിയ ​ഗർഭഛിദ്ര ​ഗുളിക കഴിച്ചെങ്കിലും ശ്രമം നടന്നില്ല. തുടർന്ന് അടുത്ത ബന്ധുവിന്റെ വീട്ടിൽ വച്ച് പ്രസവിച്ച കുഞ്ഞിനെ നെഞ്ചിലമർത്തി ശ്വാസം മുട്ടിച്ച് കൊലപ്പെടുത്തിയ ശേഷം വീട്ടുമുറ്റത്ത് കുഴിച്ചിടുകയായിരുന്നു.

തെരുവ് നായ്‌ക്കൾ കുഴി മാന്തി പുറത്തെടുത്തതോടെയാണ് സംഭവം നാട്ടുകാർ അറിയുന്നത്. പ്രദേശവാസികളുടെയും ആശാ വർക്കറുടെയും സ​ഹായത്തോടെ നടത്തിയ അന്വേഷണത്തിലാണ് ഇരുവരും അറസ്റ്റിലാകുന്നത്. ഭാര്യ ഗർഭിണിയാണെന്ന കാര്യം മറച്ച് വയ്‌ക്കുകയും ഗർഭ ഛിദ്രത്തിന് പലതവണ ശ്രമിക്കുകയും ചെയ്തതായിരുന്നു മഹേഷിനെതിരെയുള്ള കുറ്റം.