കീഴടങ്ങിയില്ലെങ്കിൽ ബലം പ്രയോ​ഗിക്കേണ്ടിവരും, എസ് എഫ് ഐ പ്രവർത്തകരെ പൊക്കിയെടുത്തി അറസ്റ്റ് ചെയ്ത് പൊലീസ്

മലപ്പുറം∙ കാലിക്കറ്റ് സർവകലാശാല സെനറ്റ് യോഗത്തിനെത്തിയ ഗവർണറുടെ നോമിനികളെ എസ്എഫ്ഐ പ്രവർത്തകർ തടഞ്ഞു. തുടർന്നു നടന്ന പ്രതിഷേധം സംഘർഷത്തിലെത്തി. സ്ഥലത്തെത്തിയ ഡിവൈഎസ് പി അടക്കം പ്രവർത്തകരെ നേരിട്ടു. ഒടുവിൽ ബലപ്രയോ​ഗത്തിലൂടെ എസ് എഫ് ഐ പ്രവർത്തകരെ അറസ്റ്റ് ചെയ്തു പൊലീസ്.

അഞ്ചു മിനിറ്റിനുള്ളിൽ കീഴടങ്ങിയിലെലങ്കിൽ അറസ്റ്റ് ചെയ്യുമെന്ന് ഉദ്യോ​ഗസ്ഥർ മുന്നറിയിപ്പ് നല്കിയിരുന്നു. മുന്നറിയിപ്പിനെയും അവഗണിച്ച് പ്രതിഷേധം തുടർന്നതോടെ ബലം പ്രയോഗിച്ച് എസ്എഫ്ഐ പ്രവർത്തകരെ പൊക്കിയെടുത്ത് അറസ്റ്റ് ചെയ്യുകയായിരുന്നു.

കാലിക്കറ്റ് സർവകലാശാല സെനറ്റ് ഹാളിന് മുന്നിലായിരുന്നു സംഭവങ്ങൾ. ഗവർണറുടെ നോമിനികളെ എസ്എഫ്ഐ പ്രവർത്തകർ തടഞ്ഞതാണ് സംഘർഷത്തിനിടെയാക്കിയത്. സെനറ്റ് ഹാളിന്റെ ഇരുകവാടങ്ങളിലുമായി കുത്തിയിരുന്ന് പ്രതിഷേധിച്ച എസ്എഫ്ഐ പ്രവർത്തകരെ ബലപ്രയോഗത്തിലൂടെയാണ് പൊലീസിന് നീക്കാനായത്.

ഇതിനിടെ ഗവർണറെ അധിക്ഷേപിച്ചും പ്രവർത്തകർ മുദ്രവാക്യം മുഴക്കി. ആരിഫ്ഖാനെ തെമ്മാടി, ഹലോ മിസ്റ്റർ ആരിഫ് ഖാൻ… ഈഫ് യു ആർ എ ജന്റിൽമാൻ… രാജിവച്ച് പുറത്തു പോകൂ…തുടങ്ങി മുദ്രാവാക്യങ്ങൾ എസ്എഫ്ഐ പ്രവർത്തകർ ഉയർത്തി.