ഉറ്റ സുഹൃത്ത് വേർപെട്ടതറിയാതെ അനുശ്രി, ആശുപത്രിയിൽ സംഘർഷാവസ്ഥ

മൂവാറ്റുപുഴ നിർമ്മല കോളജിനു മുന്നിൽ ബൈക്ക് ഇടിച്ച് മരിച്ച നമിതയുടെ മരണം ഇപ്പോഴും വിശ്വസിക്കാനാവുന്നില്ല. കോളജ് അധികൃതരും സഹപാഠികളും അന്തിമോപചാരമർപ്പിച്ചു. അപകടം ബൈക്ക് ഓടിച്ച ആൻസൺ മനപ്പൂർവം വരുത്തിവച്ചതാണെന്ന് ആരോപിച്ച് വിദ്യാർഥികൾ രംഗത്തെത്തി.

ഗുരുതര പരുക്കേറ്റ നമിതയുടെ കൂട്ടുകാരി അനുശ്രീ രാജിനെ വിദഗ്ധ ചികിത്സയ്ക്കായി കോട്ടയം കാരിത്താസ് ആശുപത്രിയിൽ പ്രവേശിപ്പിച്ചു. അനുശ്രീ രാജിനെ നമിതയുടെ മരണ വിവരം അറിയിച്ചിട്ടില്ല. നമിതയും അനുശ്രീ രാജും ഒരുമിച്ചു റോഡിനു കുറുകെ കടക്കുമ്പോഴായിരുന്നു ബൈക്ക് ഇരുവരെയും ഇടിച്ചു തെറിപ്പിച്ചത്. ഇടിയുടെ ആഘാതത്തിൽ അനുശ്രീ ഉയർന്നു പൊങ്ങി റോഡിലേക്കു തെറിച്ചു വീഴുകയായിരുന്നു.

അപകടത്തിൽ പരുക്കേറ്റ് മൂവാറ്റുപുഴ നിർമല മെഡിക്കൽ സെന്ററിൽ പ്രവേശിപ്പിച്ച ആൻസനെ വിദ്യാർഥികളുടെ പ്രതിഷേധത്തിനിടെ വിദഗ്ധ ചികിത്സയ്ക്കായി കോട്ടയം മെഡിക്കൽ കോളജിലേക്കു മാറ്റി. സഹപാഠിയുടെ മരണത്തിനു കാരണക്കാരനായ ആൻസനെ വിട്ടുകിട്ടണമെന്ന് ആവശ്യപ്പെട്ട് വിദ്യാർഥികൾ രോഷാകുലരായി നിലയുറപ്പിച്ചതോടെ പുലർച്ചെ രണ്ടു മണിയോടെയാണ് ഇയാളെ മെഡിക്കൽ കോളജിലേക്കു മാറ്റിയത്.

അപകടത്തിനു ശേഷം ആൻസൻ നടത്തിയ പ്രതികരണവും അപകടപ്പെട്ടവർക്കെതിരെ പറഞ്ഞ പുലഭ്യവുമൊക്കെയാണ് കുട്ടികളെ പ്രകോപിപ്പിച്ചത്. അപകടമുണ്ടാകുന്നതിനു മുൻപ് അതുവഴി അമിതവേഗത്തിൽ സഞ്ചരിച്ച ആൻസനോട് വേഗം കുറയ്ക്കണമെന്ന് പലരും ആവശ്യപ്പെട്ടിരുന്നെങ്കിലും അതു തള്ളിക്കളഞ്ഞ് മനപ്പൂർവമെന്നവണ്ണം അതിവേഗത്തിൽ വാഹനമോടിക്കുകയായിരുന്നു എന്ന് ദൃക്സാക്ഷികൾ പറഞ്ഞു.