അറസ്റ്റിലായ തുഷാരയ്‌ക്കെതിരെ മതസ്പര്‍ദ്ധയുണ്ടാക്കിയതിനും 7 ലക്ഷം രൂപയുടെ സാധനങ്ങള്‍ മോഷ്ടിച്ചതിനും കേസെടുത്തു

വധശ്രമത്തിന് പുറമെ രണ്ടു കേസുകള്‍ കൂടി തുഷാരയുടെയും കൂട്ടരുടെയും മേല്‍ പോലീസ് എടുത്തു. വധശ്രമം, മതസ്പര്‍ധ വളര്‍ത്താന്‍ ഗൂഢാലോചന, മോഷണം എന്നീ കുറ്റങ്ങള്‍ക്കു 3 കേസുകളാണ് എടുത്തിരിക്കുന്നത്. 2 പേരെ ഞായറാഴ്ച പിടികൂടിയിരുന്നു. നിലംപതിഞ്ഞിമുകളിലെ ഫുഡ്കോര്‍ട്ടില്‍ കട നടത്തുകയാണെന്ന് അവകാശപ്പെടുന്ന തുഷാരയും കൂട്ടാളികളും ചേര്‍ന്നു പാനിപുരി സ്റ്റാള്‍ പൊളിച്ചപ്പോള്‍ ചോദ്യം ചെയ്ത റസ്റ്ററന്റ് ഉടമകളായ നകുല്‍, സുഹൃത്ത് ബിനോജ് ജോര്‍ജ് എന്നിവരാണ് ആക്രമണത്തിനിരയായത്.

ഇവരുടെ പരാതിയിലാണ് വധശ്രമക്കേസ്. കടയുടെ മുന്‍പില്‍ നോണ്‍ ഹലാല്‍ ബോര്‍ഡ് സ്ഥാപിച്ചതാണ് പ്രശ്നങ്ങള്‍ക്കു കാരണമെന്നു തുഷാരയും സംഘവും സമൂഹ മാധ്യമങ്ങളിലൂടെ പ്രചരിപ്പിച്ചു മത സ്പര്‍ധയുണ്ടാക്കാന്‍ ശ്രമിച്ചെന്നാണ് രണ്ടാമത്തെ കേസ്. റസ്റ്ററന്റ് ഉടമകളെ ആക്രമിച്ചതിനു ശേഷം കേസ് വഴി തിരിച്ചു വിടാനാണ് നോണ്‍ ഹലാല്‍ ബോര്‍ഡ് സ്ഥാപിച്ചതെന്നു പൊലീസ് കണ്ടെത്തി.

സമീപത്തെ കടകളില്‍ നിന്നു തുഷാരയും സംഘവും 7 ലക്ഷം രൂപയുടെ സാധനങ്ങള്‍ മോഷ്ടിച്ചെന്നാണ് മൂന്നാമത്തെ കേസ്. ആക്രമണത്തില്‍ സാരമായി പരുക്കേറ്റ ബിനോജ് ശസ്ത്രക്രിയയ്ക്കു വിധേയനായി ഇപ്പോഴും ചികിത്സയിലാണ്. തുഷാരയുടെ ഭര്‍ത്താവ് അജിത് ചേരാനല്ലൂര്‍ ഇംതിയാസ് വധക്കേസിലുള്‍പ്പെടെ പ്രതിയാണ്. വിനൂപ് 6 ക്രിമിനല്‍ കേസുകളിലും പ്രതിയാണ്.