ജനവിഭാഗങ്ങളുടെ ‘വംശശുദ്ധി’ പഠിക്കാൻ കേന്ദ്ര സാംസ്കാരിക മന്ത്രാലയം

ഇന്ത്യയിലെ ജനവിഭാഗങ്ങളുടെ ‘വംശശുദ്ധി’ കണ്ടെത്താനുള്ള നടപടികൾ ആരംഭിച്ചു. ജനിതക ചരിത്രം സ്ഥാപിക്കാനും ഡിഎൻഎ പഠനത്തിനുമാണ് കേന്ദ്ര സാംസ്കാരിക മന്ത്രാലയം നടപടികൾ ആരംഭിച്ചിരിക്കുന്നത്.

പ്രശസ്ത പുരാവസ്തുഗവേഷകൻ പ്രഫ. വസന്ത് എസ്. ഷിൻഡെയുമായും മുതിർന്ന ശാസ്ത്രജ്ഞരുമായും 2 മാസം മുൻപ് ഹൈദരാബാദിൽ കേന്ദ്ര സാംസ്കാരിക വകുപ്പ് സെക്രട്ടറി ഗോവിന്ദ് മോഹൻ ഇതു സംബന്ധിച്ചു ചർച്ച നടത്തിയിരുന്നു. പിന്നാലെ ഡിഎൻഎ സമാഹരണം ആരംഭിച്ചു. ലക്നൗ ആസ്ഥാനമായ ബിർബൽ സഹാനി ഇൻസ്റ്റിറ്റ്യൂട്ട് ഓഫ് പാലിയോസയൻസസിലെ (ബിഎസ്ഐപി) വിദഗ്ധരും പദ്ധതിയുമായി സഹകരിക്കുന്നുണ്ട്.

10,000 വർഷങ്ങൾക്കിടെ ഇന്ത്യൻ ജനവിഭാഗങ്ങളിലെ ജനിതക മിശ്രണം, ജനിതക പരിണാമങ്ങൾ എന്നിവയാണു പഠന ലക്ഷ്യമെന്നും ഇതിലൂടെ ഇന്ത്യൻ ജനിതക ചരിത്രം കണ്ടെത്താനാവുമെന്നും ഹാരപ്പൻ ജനതയുമായി ബന്ധപ്പെട്ട ജനിതക പഠനങ്ങൾ നടത്തിയിട്ടുള്ള ഷിൻഡെ വ്യക്തമാക്കി. ആർക്കിയോളജിക്കൽ സർവേ ഓഫ് ഇന്ത്യയും പഠനത്തിൽ പങ്കു ചേർന്നതായാണു റിപ്പോർട്ട്.