ദേശീയപാർട്ടി പദവി നഷ്ടമാകുമെന്ന് ഭയമുണ്ട്, ഈനാംപേച്ചി, നീരാളി തുടങ്ങിയ ചിഹ്നങ്ങളില്‍ സിപിഎം മത്സരിക്കേണ്ടി വരും, എ കെ ബാലൻ

കോഴിക്കോട്: ലോക്‌സഭാ തിരഞ്ഞെടുപ്പ് ആസന്നമായിരിക്കേ ഇടതു പാര്‍ട്ടികള്‍ക്ക് മുന്നറിയിപ്പുമായി സി പി എം നേതാവ് എ കെ ബാലന്‍.
ഇടതുപാർട്ടികൾ ചിഹ്നം സംരക്ഷിക്കണം. ദേശീയപാർട്ടി പദവി നഷ്ടപ്പെട്ടാൽ അടുത്ത തിരഞ്ഞെടുപ്പിൽ ഈനാംപേച്ചി, നീരാളി പോലുള്ള ചിഹ്നങ്ങളാകും തിരഞ്ഞെടുപ്പ് കമ്മിഷൻ നൽകുക എന്നും അദ്ദേഹം പറഞ്ഞു. കെ.എസ്.എഫ്.ഇ.ഒ.യു. കാസർകോട്, കണ്ണൂർ, കോഴിക്കോട്, വയനാട് മേഖലാതല നേതൃശില്പശാല ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സി.പി.എമ്മിന്റെ ദേശീയപാർട്ടി പദവി ഇല്ലാതാക്കാൻ ശ്രമം നടക്കുന്നു. അരിവാൾ ചുറ്റിക നക്ഷത്രം സംരക്ഷിക്കപ്പെടണമെങ്കിൽ നിശ്ചിത ശതമാനം വോട്ടും എംപിമാരും വേണം. അതില്ലെങ്കിൽ സ്വതന്ത്ര പാർട്ടിയുടെ സ്റ്റാറ്റസേ ഉണ്ടാകുവെന്ന് ബാലൻ പറഞ്ഞു. അടുത്ത ഇലക്ഷന് ഇടത് സ്ഥാനാർത്ഥിക്ക് തേളിന്റെ ചിഹ്നത്തിലോ അല്ലെങ്കിൽ നീരാളിയുടെ ചിഹ്നത്തിലോ വോട്ട് അഭ്യർത്ഥിക്കേണ്ടി വരുന്നമെന്നും ബാലൻ അണികൾക്ക് മുന്നറിയിപ്പ് നൽകി.

സൈക്കിൾ വരെയുള്ള ചിഹ്നങ്ങൾ മറ്റുള്ളവർക്ക് അനുവദിച്ചു. ഈനാംപേച്ചി, നീരാളി പോലുള്ള ചിഹ്നങ്ങളാകും നമുക്ക് തിരഞ്ഞെടുപ്പ് കമ്മീഷൻ നൽകുക. അതിലേക്ക് എത്തരുത്- എ.കെ. ബാലൻ പറഞ്ഞു. പ്രതിപക്ഷം പുല്ലൂട്ടിയിൽ കിടക്കുന്ന പട്ടിയെന്ന് പറഞ്ഞ അദ്ദേഹം, ചതിയൻമാരുടെ പാർട്ടിയാണ് കോൺഗ്രസെന്നും ആരോപിച്ചു. പത്മജ പോയിട്ട് എന്തെല്ലാമാണ് പറയുന്നത്. കോൺഗ്രസ് എന്ന് പറയാൻ എന്ത് ധാർമികതയാണ് ഉള്ളത്. പാർട്ടിയുടെ മയ്യത്ത് ആയിരിക്കും ലോക്സഭാ തിരഞ്ഞെടുപ്പിൽ ഉണ്ടാവുകയെന്ന് എകെ ബാലൻ പറഞ്ഞു.