സോഫ്റ്റ് ലാൻഡിംഗിനായി എല്ലാം സജ്ജം, വിവരങ്ങൾ പങ്കുവെച്ച് ഐഎസ്ആർഒ

ബെംഗളുരു: ചന്ദ്രയാൻ 3 സോഫ്റ്റ് ലാൻഡിംഗിനായി എല്ലാ ഒരുക്കങ്ങളും പൂർത്തിയായതായി ഐഎസ്ആർഒ. ബുധനാഴ്ച വൈകുന്നേരം 5.44ന് ലാൻഡർ മൊഡ്യൂൾ എത്താനായി കാത്തിരിക്കുകയാണ് ഇന്ത്യ. ഇന്ത്യയുടെ ചന്ദ്രയാൻ ദൗത്യത്തിൽ ഉറ്റുനോക്കുകയാണ് ലോകം.

ലാൻഡറിന്റെ പ്രവർത്തനങ്ങൾ നിരീക്ഷിക്കാനായി ഓപ്പറേഷൻ ടീം സജ്ജമാണെന്നും ഐഎസ്ആർഒ ചിത്രങ്ങൾ പങ്കുവെച്ചുകൊണ്ട് എക്‌സിലൂടെ അറിയിച്ചു. ഇന്ന് വൈകുന്നേരം 6.04 ഓടെ സേഫ് ലാൻഡിംഗ് സാദ്ധ്യമാകുമെന്നാണ് ഇസ്രോ പ്രതീക്ഷിക്കുന്നത്. 5.30 മുതൽ ഇതിനായുള്ള നീക്കങ്ങൾ തുടങ്ങും.

ലാൻഡിംഗിന് മുന്നോടിയായി പ്രധാനമായും നാല് ഘട്ടങ്ങളാണുള്ളത്. റഫ് ബ്രേക്കിംഗ്, ആറ്റിറ്റ്യൂഡ് ഹോൾഡ്, ഫൈൻ ബ്രേക്കിംഗ്, ടെർമിനൽ ഡിസൻഡ് എന്നീ ഘട്ടങ്ങൾ പൂർത്തിയാക്കിയ ശേഷമാകും പേടകം ലാൻഡിംഗിലേക്ക് കടക്കുക. ഇവ നാലും പൂർത്തിയാകുന്നതോടെ ലാൻഡർ ചന്ദ്രോപരിതലത്തിന് 10 മീറ്റർ മുകളിലെത്തും. ശേഷം എഞ്ചിനുകൾ ഓഫ് ആകുകയും ലാൻഡർ താഴേക്ക് ഇറങ്ങുകയുമാണ് ചെയ്യുക.