ഗുണ്ടയുടെ ഉറ്റ കൂട്ടുകാരനായിരുന്ന ചങ്ങനാശേരി ഡിവൈഎസ്പിക്ക് സ്ഥലം മാറ്റം.

കോട്ടയം. കുഴപ്പണൽ കടത്ത്, ലഹരി കടത്ത്, ഹണി ട്രാപ്പ്, വഞ്ചന കുറ്റം തുടങ്ങിയ നിരവധി കേസുകളിൽ പ്രതിയായ ഗുണ്ടയുടെ ഉറ്റ കൂട്ടുകാരനായിരുന്ന ചങ്ങനാശേരി ഡിവൈഎസ്പി ചെയ്ത ഗുരുതരമായ കുറ്റത്തിന് വെറുമൊരു ‘സ്ഥലം മാറ്റം’ ശിക്ഷ.
കോട്ടയത്ത് പൊലീസ്-ഗുണ്ടാ മാഫിയ ബന്ധമെന്ന് ദക്ഷിണ മേഖല ഐജിയുടെ റിപ്പോർട്ടിന്റെ അടിസ്ഥാനത്തിൽ ചങ്ങനാശേരി ഡിവൈഎസ്പി ശ്രീകുമാറിനെ സ്ഥലംമാറ്റി. പാലക്കാട് ജില്ലാ ക്രൈം റെക്കോർഡ്സ് ബ്യൂറോയിലേക്കാണ് ശ്രീകുമാറിനെ മാറ്റിയിരിക്കുന്നത്.

നിരവധി കേസുകളിൽ പ്രതിയായ ഏറ്റുമാനൂ‍ർ സ്വദേശി അരുണ്‍ ഗോപനുമായി ബന്ധമുണ്ടെന്ന ഐജി പ്രകാശ് റിപ്പോർട്ട് നൽകിയ സംഭവത്തിലെ വിരുതനായ ഡിവൈഎസ്പി ശ്രീകുമാറിനാണു വെറും ഒരു സ്ഥലം മാറ്റം മാത്രം ശിക്ഷനൽകിയിരിക്കുന്നത്. ഐജിയുടെ റിപ്പോർട്ടിന്റെ അടിസ്ഥാനത്തിൽ കോട്ടയം സൈബർ പൊലീസ് സ്റ്റേഷൻ എസ്എച്ച്ഒ ആയിരുന്ന അരുണിനെ മലപ്പുറത്തേക്ക് മാറ്റിയിരുന്നു. മലപ്പുറത്തും സൈബർ പൊലീസ് സ്റ്റേഷനിലാണ് ഇയാളെ നിയമിച്ചിരിക്കുന്നത്.

ഗുണ്ട അരുണ്‍ ഗോപനുമായി ക്രമസമാധാന ചുമതലയുള്ള ഡിവൈഎസ്പിക്കും, ഒരു ഇൻസ്പക്ടർക്കും, രണ്ടു പൊലീസുകാർക്കും അടുത്ത ബന്ധമെന്നാണ് ഐജി റിപ്പോർട്ട് നൽകിയത്. ഗുണ്ട അരുൺ ഗോപനെ കസ്റ്റഡയിലെടുത്തപ്പോള്‍ പൊലീസ് ബന്ധം പുറത്തു പറയാതിരിക്കാൻ ഡിവൈഎസ്പി സ്റ്റേഷനിൽ കയറി ഭീഷണിപ്പെടുത്തുകയുണ്ടായെന്നും റിപ്പോർട്ടിൽ പറയുന്നു. തുടർന്ന് ഉദ്യോഗസ്ഥർക്കെതിരെ ഡിജിപി നടപടിക്ക് ശുപാർശ ചെയ്യുകയായിരുന്നു.