അബി​ഗേലും ജോനാഥനും പ്രതികളെ തിരിച്ചറിഞ്ഞു, പിടിയിലായവരുമായി തനിക്ക് യാതൊരു ബന്ധവും ഇല്ലെന്ന് ആവർത്തിച്ച് റെജി

കൊല്ലം: ഓയൂരിൽ നിന്ന് ആറ് വയസ്സുകാരിയെ തട്ടിക്കൊണ്ടു പോയ കേസിലെ പ്രതികളെ തിരിച്ചറിഞ്ഞു. പത്മകുമാർ, ഭാര്യ അനിത, മകൾ അനുപമ എന്നിവരെയാണ് ആറുവയസുകാരിയും സഹോദരനും തിരിച്ചറിഞ്ഞത്. കുട്ടികളുടെ പിതാവാണ് ഈ വിവരം മാധ്യമങ്ങളോട് പങ്കു വെച്ചത്. അതേസമയം പിടിയിലായവരുമായി തനിക്ക് യാതൊര ബന്ധവും ഇല്ലെന്ന് ആവർത്തിച്ച് പറയുകയാണ് കുട്ടിയുടെ പിതാവ് റെജി. ചാത്തന്നൂർ ഭാഗത്ത് തനിക്ക് അറിയുന്ന ആരും ഇല്ല. കുട്ടി പ്രതികളെ തിരിച്ചറിഞ്ഞുവെന്നും റെജി പറഞ്ഞു.

പ്രതികളായ പത്മകുമാറും കുടുംബവും കിഡ്നാപ്പിംഗ് സംഘമാണെന്നാണ് പൊലീസ് നൽകുന്ന വിവരം. പല കുട്ടികളെയും തട്ടി കൊണ്ടുപോകാൻ ശ്രമം നടത്തിയതായാണ് പ്രതികൾ മൊഴി നൽകിയിരിക്കുന്നത്. അബിഗേലിനെ തട്ടിക്കൊണ്ടുപോകാൻ ഇവർ മൂന്ന് തവണയാണ് ശ്രമം നടത്തിയത്. പ്രതികളുടെ അറസ്റ്റ് രേഖപ്പെടുത്തി.

കുട്ടികളെ തട്ടിക്കൊണ്ടുപോയി മോചനദ്രവ്യം വാങ്ങാമെന്നായിരുന്നു പദ്ധതി. ഇതിനുള്ള ട്രയൽ കിഡ്നാപ്പിം​ഗ് ആണ് അബിഗേലിന്റെ തട്ടിക്കൊണ്ടുപോകലെന്നാണ് പ്രതികൾ നൽകിയിരിക്കുന്ന മൊഴി. ആദ്യം കേബിൾ ഓപ്പറേറ്ററായിരുന്ന പത്മകുമാർ പിന്നീട് റിയൽ എസ്റ്റേറ്റ്, ബേക്കറി അടക്കമുള്ള ബിസിനസുകളിലേക്ക് തിരിഞ്ഞു. ഇയാൾക്ക് 2 കോടിയുടെ കടമുണ്ടെന്നാണ് പറയുന്നത്.