സംഘര്‍ഷത്തില്‍ കമാന്‍ഡിങ് ഓഫീസര്‍ കൊല്ലപ്പെട്ടു, ഒടുവില്‍ സമ്മതിച്ച് ചൈന

ഇന്ത്യ-ചൈന അതിര്‍ത്തിയില്‍ സംഘര്‍ഷം പുകയുകയാണ്. കാര്യങ്ങള്‍ ശാന്തമാകാത്തതോടെ കരസേന മേധാവി ജനറല്‍ മുകുന്ദ് നരവനെ ഇന്ന് ലഡാക്കില്‍ എത്തും. ഇരു സേനകളും ഗല്‍വാന്‍ അതിര്‍ത്തിയില്‍ കഴിഞ്ഞ ദിവസം ചര്‍ച്ചകള്‍ നടത്തിയതിന് പിന്നാലെയാണ് കരസേന മേധാവിയുടെ സന്ദര്‍ശനം. ഇരു സേനകളും തമ്മിലുള്ള സംഘര്‍ഷത്തില്‍ കമാന്‍ഡിങ് ഓഫീസര്‍ കൊല്ലപ്പെട്ടെന്ന് ചര്‍ച്ചയില്‍ ചൈന സമ്മതിച്ചു.

ഇരു രാജ്യങ്ങളിലെയും വിദേശകാര്യമന്ത്രിമാര്‍ ഇന്ന് കൂടിക്കാഴ്ച നടത്തും. റഷ്യ കൂടി ഉള്‍പ്പെടുന്ന വിദേശകാര്യ മന്ത്രിമാരുടെ സംയുക്ത യോഗത്തിലാണ് ഇരു വിദേശകാര്യമന്ത്രിമാരും മുഖാമുഖം വരിക. മാത്രമല്ല ആഭ്യന്തരമന്ത്രാലയം വിളിച്ച ഉന്നതതല യോഗത്തില്‍ അതിര്‍ത്തിയിലെ 32 റോഡ് നിര്‍മ്മാണ പദ്ധതികള്‍ വേഗത്തിലാക്കാന്‍ തീരുമാനമായി. ചൈനയുടെ പ്രകോപനത്തിന് കാരണവും ഈ റോഡ് നിര്‍മാണമാണ്.

പാംഗോങ് തടാകത്തോട് ചേര്‍ന്നുള്ള മലനിരകളില്‍ ഇന്ത്യന്‍ ഭാഗത്തേക്ക് ചൈനീസ് സേന കടന്നുകയറിയതിന്‍ഫെ ഉപഗ്രഹ ദൃശ്യങ്ങളും പുറത്ത് വന്നിട്ടുണ്ട്. അതിര്‍ത്തി ലംഘിച്ചിട്ടില്ലെന്ന ചൈനയുടെ വാദങ്ങള്‍ പൊളിക്കുന്നതാണ് ഓസ്‌ട്രേലിയന്‍ ഉപഗ്രഹ വിശകലന വിദഗ്ധന്‍ നേഥന്‍ റൂസര്‍ പുറത്തുവിട്ട ദൃശ്യങ്ങള്‍. 8 മലനിരകളുള്ള പാംഗോങ്ങില്‍ നാലാം മലനിര വരെയാണ് ചൈന അതിക്രമിച്ചു കയറിയിരിക്കുന്നത്. ഇവിടെ 62 സ്ഥലങ്ങളില്‍ മുന്നൂറോളം ടെന്റുകളും നിരീക്ഷണ പോസ്റ്റുകളും സ്ഥാപിച്ചു. ഏറ്റുമുട്ടലുണ്ടായ തടാകക്കരയിലും ചൈനീസ് സേനയുടെ ടെന്റുകളുണ്ട്. ശക്തമായ പ്രതിരോധമൊരുക്കി ഇന്ത്യന്‍ സേന നാലാം മലനിരയില്‍ നിലയുറപ്പിച്ചിരിക്കുകയാണ്.