ദാരിദ്ര്യം ഏറ്റവും കുറവ് കേരളത്തിലെന്ന് മുഖ്യമന്ത്രി; കാര്യം ശരിയാ, പക്ഷേ ആ സര്‍വ്വേ ഫലം ഉമ്മന്‍ ചാണ്ടിയുടെ ഭരണകാലത്തേതെന്ന് തിരുത്തി സോഷ്യല്‍മീഡിയ; പോസ്റ്റിട്ട് പുലിവാല് പിടിച്ച് മുഖ്യമന്ത്രി

രാജ്യത്ത് ദരിദ്രരുടെ എണ്ണം ഏറ്റവും കുറവുള്ള സംസ്ഥാനം കേരളമാണെന്ന നീതി ആയോഗിന്റെ റിപ്പോർട്ടിന് പിന്നാലെ തങ്ങളുടെ ഭരണമികവാണ് ഈ നേട്ടത്തിന് പിന്നിലെന്ന് പ്രഖ്യാപിച്ച മുഖ്യമന്ത്രി പിണറായി വിജയന് തിരിച്ചടി. നീതി ആയോഗ് ബഹുതല ദാരിദ്യ സൂചിക തയ്യാറാക്കിയത് 2015-16 ലെ കുടുംബാരോഗ്യ സർവേ നാലിന്റെ അടിസ്ഥാനത്തിലെന്നാണെന്ന വിവരം പുറത്തായി. ഇതോടെ മുഖ്യമന്ത്രി പിണറായി വിജയനും എൽഡിഎഫും കേരളത്തിന്റെ നേട്ടം സംബന്ധിച്ച് നടത്തിയ അവകാശവാദം തെറ്റാണെന്നാണ് വ്യക്തമാകുന്നത്.

മഹാമാരിയും പ്രകൃതി ദുരന്തങ്ങളുമുൾപ്പെടെ അനവധി വെല്ലുവിളികൾ നേരിടേണ്ടി വന്നിട്ടും ജനക്ഷേമം ഉറപ്പുവരുത്തുന്നതിനായി സർക്കാർ നടത്തിയ വിട്ടുവീഴ്ചയില്ലാത്ത പ്രവർത്തനങ്ങൾ ഈ നേട്ടത്തിന്റെ അടിത്തറ പാകി എന്നത് അഭിമാനകരമാണെന്നാണ് മുഖ്യമന്ത്രി ഫെയ്സ്ബുക്കിലൂടെ അറിയിച്ചത്. എന്നാൽ കേരളം ഇത്തരമൊരു നേട്ടം സ്വന്തമാക്കിയത് 2015-16 ലെ സർവേ അടിസ്ഥാനമാക്കിയുള്ളതാണെന്നാണ് നീതി ആയോഗ് പറയുന്നത്. മുഖ്യമന്ത്രി പിണറായി വിജയന്റെ നേതൃത്വത്തിലുള്ള എൽഡിഎഫ് സർക്കാർ ആദ്യമായി അധികാരത്തിലേറുന്നത് 2016-ലാണ്. അതിന് മുമ്പുള്ള സർവേ പ്രകാരം തയ്യാറാക്കിയ സൂചികയിലെ നേട്ടത്തിൽ എൽഡിഎഫ് അവകാശവാദം ഉന്നയിക്കുന്നതിൽ യാതൊരു അടിസ്ഥാനവുമില്ലെന്നാണ് ഇതിലൂടെ വ്യക്തമാകുന്നത്.

പോഷകാഹാരം, ശിശു-കൗമാര മരണ നിരക്ക്, പ്രസവാനന്തര പരിപാലനം, സ്കൂൾ വിദ്യാഭ്യാസം, ഹാജർനില, പാചക ഇന്ധന ലഭ്യത, ശുചിത്വം, കുടിവെള്ള ലഭ്യത, വൈദ്യുതി, വീട്, സമ്പാദ്യം, ബാങ്ക് അക്കൗണ്ട് തുടങ്ങിയവയുടെ അടിസ്ഥാനത്തിലാണ് ദാരിദ്ര്യ സൂചിക തയ്യാറാക്കിയത്. സൂചികയനുസരിച്ച് ദരിദ്രർ കൂടുതൽ ബിഹാറിലാണ്. വലിയ അന്തരമാണ് കേരളവും മറ്റ് സംസ്ഥാനങ്ങളും തമ്മിൽ. 2019-20 ലെ കുടുംബാരോഗ്യ സർവേ അഞ്ചിന്റെ ഫലവും കഴിഞ്ഞ ദിവസം പുറത്തു വന്നിരുന്നു. ഇതിന്റെ അടിസ്ഥാനത്തിൽ ദാരിദ്ര്യ സൂചിക പട്ടിക പരിഷ്കരിക്കുമെന്ന് നീതി ആയോഗ് അറിയിച്ചു.

കേരളത്തിൽ ദരിദ്രരുടെ ശതമാനം 0.71 ആണ്, 10,000 ത്തിൽ 71 പേർ. അതേസമയം, ബിഹാറിൽ ജനസംഖ്യയുടെ 51.91 ശതമാനവും ജാർഖണ്ഡിൽ 42.16 ശതമാനവും യു.പി.യിൽ 37.79 ശതമാനവും ദരിദ്രവിഭാഗത്തിലാണ്. കേരളം കഴിഞ്ഞാൽ പാവപ്പെട്ടവർ കുറവ് ഗോവയിലാണ് -3.76 ശതമാനം. അയൽ സംസ്ഥാനങ്ങളായ തമിഴ്നാട്ടിൽ 4.89 ശതമാനവും കർണാടകത്തിൽ 13.16 ശതമാനവും ദരിദ്രരുണ്ട്.