കോൺഗ്രസിൽ കടുത്ത അവഗണനയെന്ന ആരോപണവുമായി മുൻ ഡിസിസി പ്രസിഡന്റ്

കോൺഗ്രസിൽ കടുത്ത അവഗണനയെന്ന ആരോപണവുമായി മുതിർന്ന കോൺഗ്രസ് നേതാവും മുൻ ഡിസിസി പ്രസിഡന്റുമായ എവി ഗോപിനാഥ് രംഗത്ത്‌. കഴിഞ്ഞ കുറച്ച് കാലമായി തന്നെ ചവിട്ടി മെതിക്കുകയാണെന്നു അദ്ദേഹം പറഞ്ഞു. കഴിഞ്ഞ അഞ്ചു കൊല്ലം തന്നെ ആരും അന്വേഷിച്ചില്ല. വർഷങ്ങളായി ഒരു കോൺഗ്രസ് നേതാവ് പോലും തന്നോട് സംസാരിക്കാറില്ല. ഷാഫി പറമ്പിലിനെതിരെ പാലക്കാട് മത്സരിക്കുന്നില്ലെങ്കിലും മറ്റൊരു പാർട്ടിയിൽ പോയാൽ എവിടെ മത്സരിക്കും എന്ന് പറയാനാകില്ലെന്നും അദ്ദേഹം പറഞ്ഞു.

താൻ മരിക്കുന്നതു വരെ കോൺ​ഗ്രസുകാരനാകണമെന്നു ആ​ഗ്രഹിച്ചിരുന്നു. എന്നാൽ ഇനിയത് നടക്കുമെന്ന് തോന്നുന്നില്ല. തന്നെ ഉപേക്ഷിച്ചവരെ തനിക്കും ഉപേക്ഷിക്കേണ്ടി വരും. കോൺഗ്രസ് ഉപേക്ഷിച്ചാൽ ആശയപരമായി യോജിക്കുന്ന കക്ഷിയുമായി ചേരും. സിപിഎമ്മുമായി ഇതുവരെ ചർച്ചകൾ ഒന്നും നടന്നിട്ടില്ല. തെരഞ്ഞെടുപ്പ് രംഗത്ത് പാലക്കാട് ജില്ലയിൽ താൻ സജീവമായി ഉണ്ടാവും. എന്നാൽ ഏത് പാർട്ടിയിലായിരിക്കും എന്ന് പിന്നീട് പറയാം എന്നും എ വി ഗോപിനാഥ് പറഞ്ഞു.