കോണ്‍ഗ്രസ് നേതാവിന്റെ വീടിന് നേരേ ബോംബേറ്, സംഭവം വടകരയില്‍

കോഴിക്കോട് : കോണ്‍ഗ്രസ് പ്രാദേശിക നേതാവിന്റെ വീടിന് നേരേ ബോംബേറ്. വടകര മണിയൂരില്‍ കഴിഞ്ഞ ദിവസം രാത്രിയിലായിരുന്നു സംഭവം. കോണ്‍ഗ്രസ് വില്യാപ്പള്ളി ബ്ലോക്ക് കമ്മിറ്റി സെക്രട്ടറി മുതുവീട്ടില്‍ ബാബുവിന്റെ വീടിന് നേരേയാണ് ആക്രമണമുണ്ടായത്. ബോംബേറില്‍ വീടിന്റെ മുകള്‍നിലയിലെ ടൈലുകള്‍ക്ക് കേടുപാട് സംഭവിച്ചു.

വെള്ളിയാഴ്ച രാത്രി 12 മണിയോടെയായിരുന്നു സംഭവം. വീടിന്റെ മുകള്‍നിലയിലേക്കാണ് അക്രമികള്‍ ബോംബെറിഞ്ഞതെന്നാണ് പറയുന്നത്. വിവരമറിഞ്ഞ് പോലീസ് സംഘം സ്ഥലത്തെത്തി പരിശോധന നടത്തി. സംഭവത്തില്‍ അന്വേഷണം ആരംഭിച്ചു. ബാബുവിന്റെ മകന്‍ വിഷ്ണു യൂത്ത് കോണ്‍ഗ്രസ് ബ്ലോക്ക് കമ്മിറ്റി പ്രസിഡന്റാണ്.

അതേസമയം വടകര ലോക്സഭാ മണ്ഡലത്തിലെ ഏഴു നിയമസഭാ മണ്ഡലങ്ങളില്‍ ആറിടത്തും എല്‍.ഡി.എഫിന് പൂർണ തകർച്ചയാണ് ഉണ്ടായത്. വലിയ ലീഡ് പ്രതീക്ഷിച്ച തലശ്ശേരി മണ്ഡലത്തില്‍ ലീഡ് 8630 വോട്ടില്‍ ഒതുങ്ങി. 2019-ലെ തിരഞ്ഞെടുപ്പില്‍പ്പോലും തലശ്ശേരി എല്‍.ഡി.എഫിന് 11,469 വോട്ടിന്റെ മേല്‍ക്കൈ നല്‍കിയിരുന്നു. കൂത്തുപറമ്പ്, വടകര, കുറ്റ്യാടി, നാദാപുരം, കൊയിലാണ്ടി, പേരാമ്പ്ര മണ്ഡലങ്ങളില്‍ ഷാഫി നേട്ടമുണ്ടാക്കി.

തലശ്ശേരി, കൂത്തുപറമ്പ് മണ്ഡലങ്ങള്‍, കോഴിക്കോട് ജില്ലയിലെ പേരാമ്പ്ര എന്നിവിടങ്ങളില്‍ വലിയ ഭൂരിപക്ഷം നേടുകയായിരുന്നു എല്‍.ഡി.എഫ്. ലക്ഷ്യം. ഇതിലൂടെ യു.ഡി.എഫ്. നാദാപുരം, കുറ്റ്യാടി, വടകര, കൊയിലാണ്ടി മണ്ഡലങ്ങളിലുണ്ടാക്കുന്ന മുന്നേറ്റത്തെ തടഞ്ഞ് ചെറിയ വോട്ടിനെങ്കിലും ജയിക്കുമെന്നും എല്‍.ഡി.എഫ്. കണക്കുകൂട്ടി. തലശ്ശേരിയില്‍ പ്രതീക്ഷിച്ചതിന്റെ പകുതിപോലും വോട്ട് കിട്ടിയില്ല.