ഓട്ടിസമുള്ള മകനെ ഭർത്താവിനെ ഏൽപ്പിച്ച് അഞ്ച് മാസമായി അമ്മ കൊറോണ ജോലിയിൽ, അമ്മ വരുന്നതും കാത്ത് മകൻ

തലശ്ശേരി ജനറൽ ആശുപത്രിയിലെ കോവിഡ് ഐസലേഷൻ വാർഡിൽ കോവിഡ് ഡ്യൂട്ടിചെയ്യുന്ന നീതുവിനെ ആശംസകൾ കൊണ്ട് മൂടുകയാണ് സോഷ്യൽ മീ‍ഡിയ. നീതുവിന്റെ പിറന്നാളിന് ഭർത്താവ് അറിയിച്ച ആശംസ സോഷ്യൽ മീഡിയയിൽ വൈറലാണ്. ഓട്ടിസം ബാധിതനായ ഏക മകനെ അഞ്ച് മാസമായി നോക്കുന്നത് ഭർത്താവാണ്.

‘ഭാര്യയാണ്… ഇന്ന് പിറന്നാൾ ആണ്. ഡൂയിങ് ഹെർ ബെസ്റ്റ് ഇൻ തലശ്ശേരി… ഇപ്പോൾ മൂന്നാമത്തെ കൊറോണ ഡ്യൂട്ടിയും ക്വാറന്റീനും കഴിഞ്ഞു. ടെസ്റ്റ് നെഗറ്റീവാണ്. അഞ്ച് മാസമായി ഞാനും കുഞ്ഞും അവളെ നേരിട്ട് കണ്ടിട്ട്… ‘ഹാപ്പി ബെർത്ത് ഡേ മൈ ഡിയർ… അയാം പ്രൗഡ് ഓഫ് യു…’ ഫേസ്ബുക്കിലെ മലയാളി ക്ലബിൽ കോട്ടയം അതിരമ്പുഴ മണിയാപറമ്പിൽ മനു വിൻസെന്റ് ഭാര്യയുടെ ചിത്രത്തോടൊപ്പമിട്ട ആശംസയിങ്ങനെ. ലക്ഷക്കണക്കിന് മലയാളികളാണ് ഈ കുറിപ്പ് നെഞ്ചോട് ചേർത്തത്.

കഴിഞ്ഞ 5 മാസമായി വീട്ടിൽ പോകാതെ, മകനെയും ഭർത്താവിനെയും കാണാതെ കോവിഡ് ഡ്യൂട്ടിയിലാണു നീതു. കോട്ടയത്തു നഴ്സിങ് അധ്യാപികയായിരുന്ന നീതുവിനു പിഎസ്‌സി മുഖേന ലഭിച്ച ആദ്യനിയമനമാണു തലശ്ശേരി ജനറൽ ആശുപത്രിയിൽ. ഫെബ്രുവരി ആദ്യ ആഴ്ച ജോലിയിൽ പ്രവേശിച്ചു. രണ്ടാഴ്ചയിലൊരിക്കൽ മകനെയും ഭർത്താവിനെയും കാണാൻ അതിരമ്പുഴയിലെ വീട്ടിലെത്താമെന്നാണു കരുതിയത്. എന്നാൽ കോവി‍ഡ് കണക്കുകൂട്ടലുകളെല്ലാം തെറ്റിച്ചു.

ജോലിയിൽ പ്രവേശിച്ചു ദിവസങ്ങൾക്കുള്ളിൽ തന്നെ കോവിഡ് ഡ്യൂട്ടി ആരംഭിച്ചു. 3 കോവിഡ് ഐസലേഷൻ ഡ്യൂട്ടിയും ക്വാറന്റീനും പൂർ‌ത്തിയാക്കി. ഇതിനിടെ, മൂന്നു മാസം മുൻപ് വീട്ടിൽ പോകാനായി അവധിയെടുത്തു, എന്നാൽ ആ സമയത്തു തലശ്ശേരി കണ്ടെയ്ൻമെന്റ് സോണായി പ്രഖ്യാപിച്ചതോടെ പോകാൻ സാധിച്ചില്ല. ഇനിയെന്നു പോകാനാകുമെന്ന കാര്യത്തിലും നീതുവിന് ഉത്തരമില്ല.