ഹിമാചലില്‍ ഏക സിറ്റിങ് സീറ്റും നഷ്ടമായി സിപിഎം

ഠിയോഗ്: ഹിമാചല്‍ സിപിഎമ്മിന് ഏക സീറ്റും നഷ്ടമായി. ഹിമാചല്‍ കോണ്‍ഗ്രസ് തിരിച്ചുപിടിച്ചപ്പോള്‍ സിറ്റിങ് സീറ്റില്‍ സിപിഎം സ്ഥാനാര്‍ഥി നാലാമതായി. സി.പി.എം. എം.എല്‍.എ. രാകേഷ് സിംഘ, കോണ്‍ഗ്രസിന്റെ കുല്‍ദീപ് സിങ് റാത്തോഡിനോടു പരാജയപ്പെട്ടു. ഠിയോഗ് മണ്ഡലത്തെയാണ് രാകേഷ് ഹിമാചല്‍ നിയമസഭയില്‍ പ്രതിനിധീകരിച്ചിരുന്നത്. കുല്‍ദീപിനും ബി.ജെ.പി. സ്ഥാനാര്‍ഥി അജയ് ശ്യാമിനും സ്വതന്ത്രസ്ഥാനാര്‍ഥി ഇന്ദു വര്‍മയ്ക്കും പിന്നില്‍ നാലാം സ്ഥാനത്തായി രാകേഷ് പിന്തള്ളപ്പെട്ടു.

കഴിഞ്ഞ നിയമസഭാ തിരഞ്ഞെടുപ്പില്‍ സി.പി.എം. വിജയിച്ച ഏകമണ്ഡലമായിരുന്നു ഠിയോഗ്. ബി.ജെ.പിയുടെ രാകേഷ് വര്‍മയെയാണ് അന്ന് രാകേഷ് സിംഘ പരാജയപ്പെടുത്തിയത്. അന്ന് 25,000-ത്തോളം വോട്ടുകളാണ് അദ്ദേഹം നേടിയത്. 42.18 വോട്ട് വിഹിതം നേടിയ അദ്ദേഹം 1983 വോട്ടുകളുടെ ഭൂരിപക്ഷത്തിലാണ്‌ സഭയിലെത്തിയത്. അജയ് ശ്യാമായിരുന്നു ബി.ജെ.പി സ്ഥാനാർത്ഥി. ആം ആദ്മി പാര്‍ട്ടിക്കുവേണ്ടി അത്തര്‍ സിങ് ചന്ദേലും മത്സരിച്ചു. എന്നാല്‍ വോട്ടെണ്ണി തുടങ്ങിയപ്പോള്‍ കുല്‍ദീപ് വിജയത്തിലേക്ക് നീങ്ങുന്നതാണ് കാണാനായത്.

ഹിമാചല്‍ പ്രദേശില്‍ സി.പി.എം. ഇക്കൊല്ലം നേരിടുന്ന രണ്ടാമത്തെ തിരിച്ചടിയാണ് രാകേഷിന്റെ പരാജയം. ഇക്കൊല്ലം ജൂണില്‍, ഷിംല കോര്‍പറേഷനിലെ ഏക സി.പി.എം. അംഗം ബി.ജെ.പിയില്‍ ചേര്‍ന്നിരുന്നു. സമ്മര്‍ഹില്‍ വാര്‍ഡില്‍നിന്നുള്ള കൗണ്‍സിലര്‍ ഷെല്ലി ശര്‍മയാണ് ബി.ജെ.പി. അംഗത്വം എടുത്തത്. 2012-ല്‍ ഷിംല കോര്‍പറേഷനിലെ മേയറും ഡെപ്യൂട്ടി മേയറും സി.പി.എം. പ്രതിനിധികളായിരുന്നു. അന്ന് മൂന്നു സീറ്റിലായിരുന്നു സി.പി.എം. വിജയിച്ചത്. എന്നാല്‍ 2017-ല്‍ ഷെല്ലി മാത്രമാണ് വിജയിച്ചത്.