ടാറ്റൂവിന്റെ മറവിൽ കോടികളുടെ മയക്കുമരുന്ന് കച്ചവടം; ജാമ്യത്തിലിറങ്ങിയ മലയാളി ദമ്പതികൾ കച്ചവടത്തിനിറങ്ങി അറസ്റ്റിലായി

ബംഗളൂരു. ഏഴു കോടി രൂപയുടെ ലഹരിമരുന്നു കേസിൽ അറസ്റ്റിലായി ജാമ്യത്തിലിറങ്ങിയ ടാറ്റു ആർട്ടിസ്റ്റുകളായ മലയാളി ദമ്പതികൾ വീണ്ടും ലഹരി മരുന്ന് കേസില്‍ പിടിയിലായി. കോട്ടയം സ്വദേശിയായ സിഗിൽ വര്‍ഗീസ് മാമ്പറമ്പിൽ (32), കോയമ്പത്തൂർ സ്വദേശിനിയായ വിഷ്ണുപ്രിയ(22) എന്നിവരാണ് വീണ്ടും പോലീസിന്റെ പിടിയിലായിരിക്കുന്നത്.

വീണ്ടും മയക്കുമരുന്ന് കച്ചവടം നടത്തിയതോടെയാണ് ഇരുവരും വീണ്ടും അറസ്റ്റിലായത്. ബംഗളൂരുവിൽ ടാറ്റൂ ആർട്ടിസ്റ്റാണ് ഇരുവരും. ബംഗളൂരു പൊലീസിന്റെ സെൻട്രൽ ക്രൈംബ്രാഞ്ച് (സിസിബി) ആണ് ഇവരെ അറസ്റ്റ് ചെയ്തത്. ദമ്പതികളിൽ നിന്ന് ഹാഷിഷ് ഓയിൽ ശേഖരിച്ച് ആവശ്യക്കാരിലേയ്ക്കെത്തിക്കുന്ന ബംഗളൂരു മഡിവാള സ്വദേശി വിക്രം (23) എന്ന വിക്കിയും ഇവരോടൊപ്പം അറസ്റിലായിട്ടുണ്ട്.

നോർത്ത് ബംഗളൂരുവിലെ കോതനൂരിൽ വാടകവീട്ടിലാണ് ദമ്പതികൾ താമസിച്ചു വന്നിരുന്നത്. ഇവർ കഴിഞ്ഞ തിങ്കളാഴ്ച പരപ്പന അഗ്രഹാരയിൽ മയക്കുമരുന്ന് ഇടപാട് നടത്തുകയായിരുന്നു. പ്രദേശത്തെ കോളേജ് വിദ്യാർത്ഥികൾക്ക് മയക്കുമരുന്ന് വിൽപ്പന നടത്തുന്നതിനിടെയാണ് മൂന്നുപേർ പിടിയിലാവുന്നത്. ആന്ധ്രാപ്രദേശിലെ വിശാഖപ്പട്ടണത്ത് നിന്നാണ് ഇവർ മയക്കുമരുന്ന് കൊണ്ടുവന്നതെന്നാണ് പറയുന്നതെങ്കിലും പോലീസ് അത് വിശ്വസിക്കുന്നില്ല.

80 ഗ്രാം ഹാഷിഷ് ഓയിലുമായി കഴിഞ്ഞ മാർച്ചിൽ വിക്രം പൊലീസിന്റെ പിടിയിലായിരുന്നു. ഇയാൾ നൽകിയ വിവരത്തിന്റെ അടിസ്ഥാനത്തിൽ വിഷ്ണുപ്രിയയുടെയും സിഗിലിന്റെയും വീട്ടിൽ പൊലീസ് പരിശോധന നടത്തി. തുടർന്നാണ് ഏഴ് കോടി വിലമതിക്കുന്ന 12 കിലോ ഹാഷിഷ് ഓയിൽ കണ്ടെത്തുകയാണ് ഉണ്ടായത്. ഈ കേസിൽ അടുത്ത ദിവസങ്ങളിലാണ് ഇവർ ജാമ്യത്തിലിറങ്ങുന്നത്.

വിഷ്ണുപ്രിയയും സിഗിലും ബംഗളൂരുവിലെ സ്വകാര്യ കോളേജിൽ ഒന്നിച്ച് പഠിക്കുമ്പോഴാണ് പരിചയപ്പെടുന്നത്. തുടർന്ന് ഇവർ വാടക വീടെടുത്ത് ടാറ്റൂ ആർട്ടിസ്റ്റുകളായി പ്രവർത്തിച്ചു വരുകയായിരുന്നു. ഇതിന്റെ മറവിൽ ഇരുവരും മയക്കുമരുന്ന് കച്ചവടം നടത്തുകയായിരുന്നു എന്നാണ് പൊലീസ് പറയുന്നത്. ആഡംബര ജീവിതം ആഗ്രഹിച്ചതിനാലാണ് ഇവർ ലഹരി ഇടപാട് നടത്തിയതെന്നും പൊലീസ് പറയുന്നുണ്ട്.