അമ്മയ്‌ക്കൊപ്പം പങ്കുവച്ച ചിത്രത്തിന് താഴെ മോശം കമന്റുകളും അസഭ്യ വർഷവും

കോരളത്തിലെ ആദ്യ ട്രാൻസ്ജെൻഡർ ദമ്പതികളാണ് നികേഷും സോനുവും. എറണാകുളത്ത് ഒരുമിച്ചാണ് താമസം. 14 വർഷം നീണ്ട ആദ്യ പ്രണയം സ്വവർഗാനുരാഗമെന്ന കാരണത്താൽ വേർപിരിഞ്ഞപ്പോൾ ഒരു ഡേറ്റിംഗ് ആപ്പിലൂടെയാണ് നികേഷും സോനുവും പ്രണയത്തിലാവുന്നതും വിവാഹം ചെയ്യുന്നതും.

അമ്മയ്‌ക്കൊപ്പമുള്ള ചിത്രം സോഷ്യൽ മീഡിയയിൽ പങ്കുവച്ചതിനെത്തുടർന്ന് സൈബർ ആക്രമണത്തിനിരയായ ഇവർ നിയമ നടപടിക്കൊരുങ്ങുന്നു.സൈബർ ആക്രമണത്തിനെതിരെ നിയമ നടപടിക്കൊരുങ്ങുന്നത്. അമ്മയോടൊപ്പം എന്ന പേരിൽ ഇരുവരും സോഷ്യൽമീഡിയയിൽ പങ്കുവെച്ച ചിത്രത്തിന് താഴെ നിരവധിയാളുകളാണ് അശ്ലീല കമന്റുകൾ ഇട്ടത്.

സ്വവർഗ്ഗാനുരാഗികളാണെന്ന കാരണത്താലാണ് ഇരുവർക്കുമെതിരെ സോഷ്യൽമീഡിയയിൽ അസഭ്യവർഷമുണ്ടായത്. ചിത്രത്തിന് താഴെ വന്ന കമന്റുകൾക്ക് പുറമേ മെസ്സഞ്ചറിലൂടെയും ഇരുവർക്കുമെതിരെ അസഭ്യവർഷവും ഭീഷണി സന്ദേശങ്ങളും അശ്ലീല പരാമർശങ്ങളും തുടർന്നു. ഇതേത്തുടർന്നാണ് ഇരുവരും നിയമനടപടിക്കൊരുങ്ങുന്നത്.

ജസ്റ്റിൻ ജോണി എന്ന പ്രൊഫൈലിൽ നിന്നാണ് മെസഞ്ചറിലൂടെ ശക്തമായ അധിക്ഷേപം നടത്തിയത്. ഹോമോഫോബിക്ക് ആയ ഒരുവന്റെ സകല ജീർണതകളുമാണ് ആ പ്രൊഫൈലിൽ നിന്ന് വരുന്നത്. അമ്മയെക്കുറിച്ചുള്ള അസഭ്യങ്ങളാണ് തങ്ങളെ വേദനിപ്പിക്കുന്നതെന്ന് നികേഷും സോനുവും പറയുന്നു. പുറത്ത് പറയാൻ കൊള്ളാത്തത്ര അശ്ലീല കമന്റുകളാണ് ആ ഒരു പ്രൊഫൈലിൽ നിന്ന് വരുന്നത്.

അമ്മയെ പറഞ്ഞതാണ് വേദനിപ്പിച്ചത്. കാരണം ജീവിതത്തിൽ ഏറ്റവും ബഹുമാനിക്കുന്നയാൾ അമ്മയാണ്. അമ്മയെ അശ്ലീലം പറഞ്ഞത് വെറുതേവിടാൻ ഉദ്ദേശിക്കുന്നില്ലെന്നും ഇരുവരും പറഞ്ഞു. അതേസമയം ഫെയ്ക്ക് ഐഡികൾക്കു പുറമേ യഥാർത്ഥ ഐഡന്റിറ്റിയിൽ നിന്ന് വരെ ആളുകൾ അധിക്ഷേപത്തിന് ധൈര്യപ്പെടുമ്പോൾ എങ്ങനെ ഇനിയും നിയമടപടികളിൽ പ്രതീക്ഷ വയ്ക്കുമെന്ന് ഇരുവരും ചോദിക്കുന്നു.