ശമ്പളം ഗഡുക്കളായി നൽകാനുള്ള തീരുമാനം സർക്കാരിന്റേതല്ല- മന്ത്രി ആന്റണി രാജു

തിരുവനന്തപുരം. ശമ്പളം ഗഡുക്കളായി നൽകാനുള്ള തീരുമാനം ജീവനക്കാരുടെ മേൽ അടിച്ചേൽപ്പിക്കില്ലെന്ന് ഗതാഗത മന്ത്രി ആന്റണി രാജു. തീരുമാനം കെഎസ്ആർടിസി മാനേജ്മെന്റിന്റേത് ആണെന്നും അതിൽ ആരും വിഷമിക്കേണ്ടതില്ലെന്നും മന്ത്രി വ്യക്തമാക്കി. ആവശ്യമെങ്കിൽ യൂണിയനുകളുമായി ചർച്ച നടത്താൻ തയ്യാറാണ്.

വിഷയത്തിൽ വിവാദം ഉണ്ടാക്കേണ്ട പ്രശ്നമില്ലെന്നും അദ്ദേഹം പറഞ്ഞു. പ്രായോഗിക തീരുമാനത്തെ തള്ളിക്കളയേണ്ട കാര്യമില്ല. ടാർഗറ്റും പുതിയ ശമ്പള ഉത്തരവുമായി ബന്ധമില്ലെന്നും ഉത്തരവിൽ അപാകതയില്ലെന്നും അദ്ദേഹം വ്യക്തമാക്കി. ശമ്പളം രണ്ട് ഗഡുക്കളായി നൽകുവാനുള്ള തീരുമാനം ജീവനക്കാരുടെ മേൽ അടിച്ചേൽപ്പിക്കാനാകില്ല. ശമ്പളം ഒരുമിച്ച് വേണ്ടവർക്ക് നൽകും.

വരുമാനത്തിനനുസരിച്ച് ശമ്പളം എന്ന നിർദേശം സർക്കാർ അല്ല മുന്നോട്ട് വെച്ചതെന്ന് മന്ത്രി വ്യക്തമാക്കി. മന്ത്രി എന്ന നിലയിൽ ഒരു നിർദേശവും വിഷയത്തിൽ മുന്നോട്ട് വെച്ചിട്ടില്ല. സർക്കാരിന്റെ നിർദേശമല്ല ഉത്തരവായി വന്നത്. കെഎസ്ആർടിസിയിലെ പ്രൊഫഷണൽ ബോർഡിന് തീരുമാനം എടുക്കാനുള്ള സ്വാതന്ത്രൃമുണ്ടെന്നും അദ്ദേഹം കൂട്ടിച്ചേർത്തു.