യുവഡോക്ടറുടെ കൊലപാതകം, 8.30-ന് മരണം സ്ഥിരീകരിച്ചു, 9.39-ന് രജിസ്റ്റർ ചെയ്ത എഫ്‌ഐആറിലുള്ളത് കൊലപാതകശ്രമം എന്ന്, അടിമുടി പിഴവ്, സുരക്ഷാവീഴ്ച ഉണ്ടായില്ലെന്നും വാദം , പകർപ്പ് പുറത്ത്

കൊല്ലം: വനിതാ ഡോക്ടർ കൊല്ലപ്പെട്ട കേസിൽ എഫ്‌ഐആറിൽ അടിമുടി പിഴവെന്ന് കണ്ടെത്തൽ. കൊട്ടാരക്കര പോലീസ് സ്‌റ്റേഷനിൽ വിവരമറിഞ്ഞത് 8.15-ന് എന്നാണ് എഫ്‌ഐആറിലുള്ളത്. 8.30-ന് ഡോ. വന്ദന ദാസിന്റെ മരണം സ്ഥിരീകരിച്ചിരുന്നെങ്കിലും 9.39-ന് രജിസ്റ്റർ ചെയ്ത എഫ്‌ഐആറിലുള്ളത് കൊലപാതകശ്രമം എന്നാണ്രേഖപ്പെടുത്തിയിട്ടുള്ളത്. ബുധനാഴ്ച രാവിലെ 4.30-നാണ് ആക്രമണം നടന്നത്.

സുരക്ഷാ വീഴ്ചയില്ലെന്ന നിലപാടിലാണ് കേരള പോലീസ്. പരിക്കേറ്റയാളെ ആശുപത്രിയിൽ എത്തിക്കുകയാണ് ചെയ്തത്. ആശുപത്രിയെത്തിക്കുന്നതുവരെ പ്രകോപനം ഇല്ലായിരുന്നുവെന്നും പറയുന്നു. സന്ദീപ് ബന്ധുവിനെയും പോലീസുകാരെയുമാണ് ആദ്യം കുത്തിയതെന്നായിരുന്നു പോലീസ് തുടക്കത്തിൽ പറഞ്ഞിരുന്നത്. എഫ്‌ഐആറിലുള്ളത് വന്ദനയെയാണ് ആദ്യം കുത്തിയതെന്നാണ്.

ദൃക്‌സാക്ഷിയും എഡിജിപി എംആർ അജിത്കുമാറും പറഞ്ഞതിന് വിരുദ്ധനമായാണ് പോലീസിന്റെ എഫ്‌ഐആർ. ആദ്യം പോലീസിനാണ് കുത്തേറ്റതെന്നാണ് എഡിജിപി പറഞ്ഞത്. എന്നാൽ വന്ദനയ്‌ക്കാണ് ആദ്യം കുത്തേറ്റതെന്നാണ് എഫ്‌ഐആർ പറയുന്നത്. ഡോ. മുഹമ്മദ് ഷിബിന്റെ മൊഴി പ്രകാരം സന്ദീപ് ആദ്യം കുത്തിയത് ഡോ. വന്ദനയെ ആണ്. ഇത് തടയാൻ ശ്രമിച്ചപ്പോഴാണ് പോലീസുകാർക്ക് പരിക്കേറ്റതെന്നും എഫ്‌ഐആറിൽ പറയുന്നു.

പ്രതി ഡ്രസിംഗ് റൂമിൽ ഉപയോഗിക്കുന്ന കത്രിക പെട്ടെന്ന് കൈക്കലാക്കിയ വന്ദനയുടെ തലയിൽ ആദ്യം കുത്തി. ഓടാൻ ശ്രമിച്ചപ്പോൾ ‘ നിന്നെയൊക്കെ കുത്തി കൊല്ലുമടീ’ എന്ന് ആക്രോശിച്ച് വീണ്ടും വന്ദനയ്‌ക്കെതിരെ തിരിഞ്ഞു. തുടർന്ന് നിരീക്ഷണ മുറിയിൽ ഓടിക്കയറിയ സന്ദീപ് ഡോക്ടറെ കഴുത്തിലും തലയിലും കുത്തുകയായിരുന്നു. ഇത് കണ്ട് തടയാനെത്തിയ പോലീസുകാരേയും ഉദ്യോഗസ്ഥരെയും ആശുപത്രി ജീവനക്കാരെയും കുത്തി പരിക്കേൽപ്പിക്കുകയായിരുന്നു.

പിന്നാലെ ആശുപത്രിയിലെ കസേരകളും ഉപകരങ്ങളും അടിച്ച് തകർത്തുവെന്നും എഫ്‌ഐആറിൽ പറയുന്നു. എന്നാൽ ആശുപതിയിൽ സംഭവസമയം ഉണ്ടായിരുന്നവർ പറഞ്ഞതും പോലീസ് തയ്യാറാക്കിയ എഫ്‌ഐആറിൽ പറയുന്നതും തമ്മിൽ ഏറെ വ്യത്യാസങ്ങളുണ്ട്.