മദ്യപാനികള്‍ക്ക് പെണ്‍മക്കളെയും സഹോദരിമാരെയും വിവാഹം കഴിച്ച് നല്‍കരുത് – മന്ത്രി കൗശല്‍ കിഷോര്‍

ലംഭുവ. സഹോദരിമാരെയും പെണ്‍മക്കളെയും മദ്യപാനികള്‍ക്ക് വിവാഹം കഴിച്ച് നല്‍കരുതെന്ന് കേന്ദ്ര ഭവന – നഗരകാര്യ സഹമന്ത്രി കൗശല്‍ കിഷോര്‍. ഒരു റിക്ഷാക്കാരനോ ഒരു തൊഴിലാളിയോ മദ്യപാനിയെക്കാള്‍ മികച്ച വരനാണെന്ന് തെളിയിക്കുമെന്നും, മദ്യപാനിയുടെ ആയുസ്സ് വളരെ കുറവാണെന്നും കൗശല്‍ കിഷോര്‍ പറഞ്ഞു. ലംഭുവ നിയമസഭാ മണ്ഡലത്തില്‍ നടന്ന ഒരു ഡീഅഡിക്ഷന്‍ പരിപാടിയില്‍ സംസാരിക്കുകയായിരുന്നു കേന്ദ്ര മന്ത്രി.

‘എന്റെ മകനായ ആകാശ് കിഷോറിന് സുഹൃത്തുക്കളോടൊപ്പം മദ്യം കഴിക്കുന്ന ശീലമുണ്ടായിരുന്നു, അവനെ ഡീ അഡിക്ഷന്‍ സെന്ററില്‍ പ്രവേശിപ്പിച്ചു. അവന്‍ ആ ദുശ്ശീലം ഉപേക്ഷിക്കുമെന്ന് കരുതി. ആറ് മാസത്തിന് ശേഷം അവന്‍ വിവാഹിതനായി. എന്നാല്‍, വിവാഹത്തിന് ശേഷം വീണ്ടും മദ്യപിക്കാന്‍ തുടങ്ങി. അത് ഒടുവില്‍ മരണത്തിലേക്ക് നയിച്ചു. രണ്ട് വര്‍ഷം മുമ്പ് ഒരു ഒക്ടോബര്‍ 19 ന് ആകാശ് മരിക്കുമ്പോള്‍ അവന്റെ മകന് രണ്ട് വയസ്സ് മാത്രമാണ് ഉണ്ടായിരുന്നത്,’ കേന്ദ്രമന്ത്രി പറഞ്ഞു.

എന്റെ മരുമകള്‍ വിധവയായത് മദ്യം മൂലമാണെന്നും ഇതില്‍ നിന്ന് പെണ്‍മക്കളെയും സഹോദരിമാരെയും രക്ഷിക്കണമെന്നും കൗശല്‍ കിഷോര്‍ പറഞ്ഞു. എംപിയായ ഞാനും എംഎല്‍എയായ ഭാര്യയും ശ്രമിച്ചിട്ടും മകന്റെ ജീവന്‍ രക്ഷിക്കാന്‍ കഴിഞ്ഞില്ല. ഒരു സാധാരണക്കാരന്‍ എന്ത് ചെയ്യുമെന്നും അദ്ദേഹം ചോദിച്ചു.

‘സ്വാതന്ത്ര്യ സമരത്തില്‍ 90 വര്‍ഷത്തിനുള്ളിൽ 6.32 ലക്ഷം പേര്‍ ബ്രിട്ടീഷുകാരോട് പോരാടി ജീവന്‍ ബലിയര്‍പ്പിക്കുകയുണ്ടായി. അതേസമയം മദ്യാസക്തി മൂലം ഓരോ വര്‍ഷവും 20 ലക്ഷം ആളുകള്‍ മരിക്കുന്നു. കാന്‍സര്‍ മൂലം ഉണ്ടാകുന്ന മരണങ്ങളില്‍ 80 ശതമാനവും പുകയില, സിഗരറ്റ്, ബീഡി എന്നിവ ശീലമാക്കുന്നത് കൊണ്ടാണെന്നും അദ്ദേഹം പറഞ്ഞു