സമൂഹവിവാഹത്തിനിടെ വരന്‍ മുങ്ങി, അന്വേഷിച്ചു പോയ ബന്ധുക്കൾ പിന്നാലെ മുങ്ങി

സമൂഹ വിവാഹത്തിൽ ചടങ്ങുകൾ നടക്കുന്നതിനിടെ വരൻ തന്ത്ര പൂർവം മുങ്ങി. അന്വേഷിച്ചിറങ്ങിയ ബന്ധുക്കൾ ആവട്ടെ പിന്നാലെ തടിതപ്പി. കനൗജിലെ സമൂഹ വിവാഹ ചടങ്ങില്‍ നിന്നാണ് വിവാഹത്തിന് നിമിഷങ്ങള്‍ മാത്രം ബാക്കി നില്‍ക്കെ വരന്‍ തന്ത്രപരമായി വിവാഹവേദയില്‍ നിന്ന് മുങ്ങുന്നത്. വരന്റെ ഭാഗത്ത് നിന്ന് ആരും ഇങ്ങനൊരു ചതി പ്രതീക്ഷിച്ചില്ല.

ചടങ്ങുകൾ നടക്കുമ്പോൾ വളരെ സന്തോഷത്തിലായിരുന്ന വരൻ പെട്ടെന്നാണ് തനിക്ക് ടോയ്ലറ്റില്‍ പോകണമെന്ന് പറഞ്ഞ് വേദയില്‍ നിന്ന് പുറത്തുപോയത്. എന്നാല്‍ ഏറെ നേരമായിട്ടും വരന്‍ തിരിച്ചെത്തിയില്ല. അപ്പോഴാണ് ഇയാള്‍ പോയത് ടോയ്ലറ്റിലേക്കല്ല, പുറത്തേക്കാണെന്ന് മനസ്സിലാവുന്നത്. ഉത്തര്‍പ്രദേശിലെ കനൗജിലാണ് സംഭവം. തുടർന്ന് നാടകീയ സംഭവമാണ് വിവാവഹ വേദയില്‍ നടന്നത്.

വിവാഹ വേദയില്‍ ഇരുന്നപ്പോഴാണ് വിവാഹം കഴിക്കണോ വേണ്ടയോ എന്ന ഒരു സംശയം വരന് തോന്നിയത്. ഇതിന് പിന്നാലെയാണ് മുങ്ങിയത്. വരനെ കാണാതായതോടെ ഇരുവിഭാഗവും തമ്മില്‍ വഴക്കുണ്ടായി. പിന്നീട് വരന്റ ബന്ധുക്കളും വധുവിന്റെ ബന്ധുക്കളും വരനെ അന്വേഷിച്ചിറങ്ങി.

വരന്‍ തിരിച്ചുവരില്ലെന്ന് മനസ്സിലായതോടെ ബന്ധുക്കളും സ്ഥലം വിടുകയായിരുന്നു. ഇതോടെ വരന്റെ വീട്ടുകാരെ അന്വേഷിച്ച് വധുവിന്റെ വീട്ടുകാര്‍ പോയി. മറ്റെല്ലാ വിവാഹങ്ങളും കഴിഞ്ഞിട്ടും ഇവരെ കണ്ടെത്താന്‍ കഴിഞ്ഞില്ല. ഇതോടെ വധു കരഞ്ഞുകൊണ്ട് വീട്ടിലേക്ക് മടങ്ങി പോവുകയും ചെയ്തു.

ഇത്തരത്തിൽ മധ്യപ്രേദശില്‍ നേരത്തെ നടന്ന ഒരു സംഭവത്തിൽ വിവാഹവേദയില്‍ നിന്ന് വരന്‍ ബൈക്കില്‍ മുങ്ങുകയായിരുന്നു. ഇതിന് പിന്നാലെ വലിയ ബഹളം നടക്കുയും അടിയുണ്ടാകുകയും ചെയ്തു. ഒടുവിലാണ് വരന്‍ നേരത്തെ വിവാഹിതനായിരുന്നു എന്ന കാര്യം പുറത്തറിയുന്നത്.