വാഹന പരിശോധനക്കിടെ എസ്‌ഐയെ ഇടിച്ചു തെറിപ്പിച്ചു ബൈക്ക് യാത്രക്കാരന്‍ മിന്നൽ പിണർ പോലെ പാഞ്ഞു.

കൊച്ചി വാഹന പരിശോധന നടത്തുകയായിരുന്ന പോലീസ് സംഘത്തിലെ എസ്‌ഐയെ ഇടിച്ചു തെറിപ്പിച്ചു ബൈക്ക് യാത്രക്കാരന്‍ നിർത്താതെ പോയി. ഫോര്‍ട്ട് കൊച്ചി എസ്‌ഐ സന്തോഷിനെ ഇടിച്ചു തെറിപ്പിച്ചാണ് ബൈക്ക് യാത്രക്കാരൻ ഓടിച്ചു പോയത്. സംഭവത്തിൽ എസ്‌ഐ സന്തോഷിനു പരിക്കേറ്റു. ഇടിച്ചിട്ട വാഹനം നിര്‍ത്താതെ പോയി. ഇയാള്‍ക്ക് വേണ്ടി പൊലീസ് അന്വേഷണം നടത്തി വരുകയാണ്.

കുറ്റകൃത്യങ്ങള്‍ വര്‍ധിച്ചെന്ന വിലയിരുത്തലില്‍ കൊച്ചിയില്‍ പൊലീസ് വ്യാപകമായി പരിശോധന നടത്തി വരുന്നതിനിടെയായിരുന്നു സംഭവം. ഓപ്പറേഷന്‍ കോമ്പിങ് എന്ന പേരിട്ടിരിക്കുന്ന പരിശോധനയില്‍ ഇതുവരെ 370 പേരെ കസ്റ്റഡിയിലെടുത്തിരിക്കുകയാണ്. കഴിഞ്ഞദിവസം ഹോട്ടലുകളിലും ലോഡ്ജുകളിലും പൊലീസ് വ്യാപക പരിശോധന നടത്തിയിരുന്നു.

മദ്യപിച്ച് വാഹനമോടിച്ചതുമായി ബന്ധപ്പെട്ട് കൊച്ചി നഗരത്തിൽ 242 കേസുകളാണ് രജിസ്റ്റര്‍ ചെയ്തത്. കഞ്ചാവ് ഉള്‍പ്പെടെ ലഹരിയുമായി 26 പേരാണ് വേട്ടക്കിടെ കുടുങ്ങിയത്. പൊതുസ്ഥലത്ത് മദ്യപിച്ചതിന് 23 പേരെ പിടികൂടി. ഇതിന് പുറമേ അപകടകരമായ രീതിയില്‍ വാഹനമോടിച്ചത് അടക്കമുള്ള ഗതാഗതനിയമ ലംഘനങ്ങള്‍ നടത്തിയവര്‍ക്കെതിരെയും പോലീസ് നടപടി സ്വീകരിച്ചു വരുകയാണ്.