ഇ ശ്രീധരൻ കേരളത്തിന്റെ ബിജെപി മുഖ്യമന്ത്രി സ്ഥാനാർത്ഥി, നേതൃതലത്തിൽ വൻ അഴിച്ചുപണി

നിയമസഭ തിരഞ്ഞെടുപ്പിന് മുന്നോടിയായി കേരള ബിജെപിയിൽ വൻ അഴിച്ചുപണി. കേരളത്തിൽ ഭരണം പിടിക്കാനായി വളരെ നിർണായകമായ തീരുമാനങ്ങളാണ് ബിജെപി എടുത്തിരിക്കുന്നത്. മെട്രോ മാൻ ഇ ശ്രീധരനെ നേതൃനിരയിലേക്കുകൊണ്ടുവന്ന് മുഖ്യമന്ത്രി സ്ഥാനാർത്ഥിയായി നിർത്താനുള്ള നീക്കം ബിജെപി നടത്തിക്കഴിഞ്ഞു. ബിജെപി പ്രസിഡന്റ് നദ്ദയും ഓർ​ഗനൈസിം​ഗ് സെക്രട്ടറി സന്തോഷും കേരളത്തിലെത്തിയതിനുശേഷമാണ് ഈ തീരുമാനമെടുത്തത്. പ്രധാനമന്ത്രിയും അമിത് ഷായുടെയും നേരിട്ടുള്ള തീരുമാനമാണിത്.

കേരളത്തിലെ നേതാക്കളുമായി ഈ വിഷയത്തിൽ ഒരു കൂടിക്കാഴ്ചയില്ല. ബം​ഗാൾ മോഡൽ കേരളത്തിൽ നടത്താൻ കേന്ദ്ര നേതൃത്വം ഒരുങ്ങിക്കഴിഞ്ഞു. പാർട്ടിയെ ജയിപ്പിക്കാനായി അർപ്പണബോധമുള്ള നേതാക്കളെയാണ് ആവശ്യമെന്ന് കേന്ദ്ര നേതാക്കൾ വ്യക്തമാക്കി. ബിജെപി എന്നാൽ യോജിച്ചുനിൽക്കേണ്ടവരെ വെറുപ്പിച്ചും അകറ്റിയും നിർത്തിപ്പോകേണ്ട സംഘടനയല്ല എന്ന് കേന്ദ്ര നേതൃത്വം വ്യക്തമാക്കി. എല്ലാ ഹൈന്ദവ സംഘടനകളെയും ഒരുമിച്ചു നിർത്താനുള്ള നീക്കം കേന്ദ്രം നടത്തിക്കഴിഞ്ഞു.

എല്ലാപാർട്ടിക്കാരും ആദരവോടെ കാണുന്ന വ്യക്തിയാണ് ഇ ശ്രീധരൻ. കേരളത്തിന്റെ വികസനത്തിന്റെ ഭാ​ഗമായ മെട്രോയുടെ സൂത്രധാരൻ ഇ ശ്രീധരനായിരുന്നു. ഇന്ത്യ ഗവർമെന്റ് 2001-ൽ പത്‌മശ്രീയും 2008 -ൽ പത്മഭൂഷണും നൽകി ആദരിച്ചിട്ടുണ്ട് .2005 -ൽ ഫ്രഞ്ച് ഗവണ്മെന്റ് ഇദ്ദേഹത്തെ “ഷെവലിയാർ ഡി ലീജിയോൺ ദ ഹൊന്നെർ” പുരസ്‍കാരം നൽകി ആദരിക്കുകയുണ്ടായി. ഇത്രയധികം പ്രശസ്തനായ ഒരു വ്യക്തിയെ മുഖ്യമന്ത്രി സ്ഥാനാർത്ഥിയായി നിർത്തുന്നതിലൂടെ എൽഡിഎഫിന്റെയും യുഡിഎഫിന്റെയും ചങ്കിടിപ്പ് വർദ്ധിക്കും