പിണറായിസത്തിന്റെ വികൃത മുഖമാണ് എളമരം കരീമിന്റെ പ്രസ്താവനകള്‍- കെ മുരളീധരന്‍

കെകെ രമക്കെതിരെയുള്ള എളമരം കരീമിന്റെ പ്രസ്താവനയില്‍ വിമര്‍ശനവുമായി കെ മുരളീധരന്‍. എളമരം കരീമിന്റെ പ്രസ്താവനകള്‍ പിണറായിസത്തിന്റെ വികൃത മുഖമാണ് കാണിക്കുന്നത്. സഹപ്രവര്‍ത്തകനെ കൊന്നതും പോര, ടിപിയുടെ ഭാര്യ കെകെ രമയെ ഒറ്റുകാരിയുമാക്കിയെന്നും കെ മുരളീധരന്‍ പറഞ്ഞു.

അതേസമയം രാജ്യസഭയിലേക്ക് നോമിനേറ്റ് ചെയ്യപ്പെട്ട പിടി ഉഷയെ കെ മുരളീധരന്‍ അഭിനന്ദിച്ചു. പിടി ഉഷയുടെ രാജ്യസഭയിലേക്കുള്ള നാമനിര്‍ദേശത്തെ വിമര്‍ശിക്കേണ്ട ആവശ്യമില്ല. സര്‍ക്കാര്‍ നൂറ് തെറ്റ് ചെയ്താലും ഒരു ശരി ചെയ്താല്‍ ആ ശരി, ശരിതന്നെയാണെന്ന് അദ്ദേഹം പ്രതികരിച്ചു. പിടി ഉഷ ഏതെങ്കിലും രാഷ്ട്രീയ പാര്‍ട്ടിയോട് കൂറ് പുലര്‍ത്തുന്ന ആളല്ലെന്നും അദ്ദേഹം പറഞ്ഞു.