വയനാട്ടിൽ കാട്ടാന ആക്രമണം, നിര്‍ത്തിയിട്ട കാറും ബൈക്കും തകർത്തു

പനമരം : നിര്‍ത്തിയിട്ട കാറും ബൈക്കും കാട്ടാന തകര്‍ത്തു. വയനാട് നടവയൽ നെയ്ക്കുപ്പയില്‍ പൊലീസ് ഉദ്യോഗസ്ഥനായ മുണ്ടക്കല്‍ അജേഷിന്റെ വാഹനങ്ങളാണ് തകർത്തത്. കഴിഞ്ഞ രാത്രിയാണ് സംഭവം. വീട്ടിലേക്കുള്ള വഴിയിലാണ് വാഹനങ്ങള്‍ നിർത്തിയിട്ടിരുന്നത്.

ആന കാറിന്റെ മുന്‍ഭാഗം ആന ചവിട്ടിത്തകര്‍ക്കുകയും, പിന്‍ഭാഗത്ത് കുത്തിതകർക്കുകയും ചെയ്‌തു. കാര്‍ മൂടിയിട്ടിരുന്ന ടാര്‍പോളിന്‍ ഷീറ്റ് വലിച്ചുകീറി. കാറിനടുത്തുണ്ടായിരുന്ന ബൈക്കും ചവിട്ടിമറിച്ചു.
വീട്ടുമുറ്റത്ത് നിര്‍ത്തിയിടുന്ന വാഹനങ്ങള്‍ ആന തകര്‍ക്കുന്നത് പതിവാണെന്ന് നെയ്ക്കുപ്പ നിവാസികള്‍ പറഞ്ഞു. ആഴ്ചകള്‍ക്ക് മുൻപ് ഓട്ടോയും ബൈക്കും കാറും ആന നശിപ്പിച്ചിരുന്നു.

വനം ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. ജനവാസ മേഖലയിലാണ് ഇത്തരം ആക്രമണം ഉണ്ടാകുന്നത് എന്നതാണ് ഗൗരവകരമായ കാണേണ്ടത്. സംസ്ഥാനത്ത് വന്യജീവികളുടെ ആക്രമണം കൂടി വരികയാണ്. കാടിനോട് ചേർന്ന പ്രാദേശികളിൽ മാത്രമല്ല ഇത്തരം ആക്രമണങ്ങൾ ഉണ്ടാകുന്നത്. കഴിഞ്ഞ ദിവസം കണ്ണൂർ അന്താരാഷ്ര വിമാനത്താവളത്തിന് സമീപവും വന്യജീവിയുടെ സാന്നിധ്യം സ്ഥിരീകരിച്ചിരുന്നു.