ലക്ഷങ്ങളുടെ സ്വർണം, കെട്ടുകണക്കിന് നോട്ടുകൾ ആഡംബര കാറുകൾ, കോൺഗ്രസ് എംഎൽഎയുടെ വീട്ടിൽ എൻഫോഴ്സ്‌മെന്റ് റെയ്ഡ്

ചണ്ഡീഗഡ്: കോൺഗ്രസ് എംഎൽഎയുടെ വീട്ടിൽ എൻഫോഴ്സ്‌മെന്റ് നടത്തിയ റെയ്ഡിൽ . ആഡംബര കാറുകളും ലക്ഷങ്ങൾ വിലവരുന്ന സ്വർണാഭരണങ്ങളും പണവും കണ്ടെടുത്തു. കള്ളപ്പണം വെളുപ്പിക്കല്‍ കേസുമായി ബന്ധപ്പെട്ട് ഹരിയാന നിയമസഭാംഗമായ ധരം സിംഗ് ചോക്കറിന്റെ വീട്ടിലായിരുന്നു പരിശോധന. നാല് കോടി രൂപ വിലമതിക്കുന്ന നാല് ആഡംബര കാറുകൾ, 14.5 ലക്ഷം രൂപയുടെ സ്വർണം, 4.5 ലക്ഷം രൂപ എന്നിവയ്ക്ക് പുറമേ നിരവധി രേഖകളും ധരംസിംഗിന്റെ വീട്ടിൽ നിന്ന് പിടിച്ചെടുത്തു.

സമൽഖ മണ്ഡലത്തിലെ എംഎൽഎ ആയ ചോക്കറിനായി പതിനൊന്ന് സ്ഥലങ്ങളിൽ തെരച്ചിൽ നടത്തിയതായി ഇ ഡി കഴിഞ്ഞ ദിവസം ഔദ്യോഗിക പ്രസ്താവനയിലൂടെ അറിയിച്ചു. ചോക്കറിന്‍റെയും കുടുംബത്തിന്‍റെയും ഉടമസ്ഥതയിലുള്ള സായ് ഐന ഫാർമ പ്രൈവറ്റ് ലിമിറ്റഡ് (ഇപ്പോൾ മഹിറ ഇൻഫ്രാടെക് പ്രൈവറ്റ് ലിമിറ്റഡ്) എന്നിവിടങ്ങളിലും മറ്റ് മഹിറ ഗ്രൂപ്പ് കമ്പനികളിലും റെയ്ഡ് നടത്തിയിരുന്നു.

ഗുരുഗ്രാമിലെ സെക്ടര്‍ 68ൽ പാര്‍പ്പിട യൂണിറ്റുകള്‍ നല്‍കാമെന്ന് വാഗ്ദാനം ചെയ്ത് 1,400ലധികം പേരില്‍ നിന്ന് 360 കോടി രൂപ തട്ടിയെടുത്തതിനും വ്യാജരേഖ ചമച്ചതിനുമാണ് എംഎല്‍എക്കെതിരെ കേസെടുത്തത്. 2019ലെ നിയമസഭാ തിരഞ്ഞെടുപ്പിന്റെ സമയത്ത് സമർപ്പിച്ച സത്യവാങ്മൂലത്തിൽ, പത്താം ക്ലാസ് വിദ്യാഭ്യാസം മാത്രമുള്ള ചോക്കര്‍ പ്രാഥമിക വരുമാന മാർഗമായി കൃഷിയാണ് കാണിച്ചിരുന്നത്.