ഈ കൊച്ച് എല്ലാം നശിപ്പിക്കുമെന്ന് ജീത്തു അങ്കിളും മോഹൻലാൽ അങ്കിളും പറയുമായിരുന്നു-എസ്തർ അനിൽ

ദൃശ്യം എന്ന ചിത്രത്തിലൂടെ ഹിറ്റായി മാറിയ ബാലതാരമാണ് എസ്തർ അനിൽ. മോഹൻലാലിന്റെ മകളായി മിന്നും പ്രകടനമാണ് താരം കാഴ്ചവെച്ചത്. ദൃശ്യത്തിന്റെ തമിഴ്, തെലുങ്ക് പതിപ്പുകളിൽ അഭിനയിക്കാൻ എസ്തറിനായി. ഒരു നാൾ വരും എന്ന സിനിമയിലാണ് എസ്തർ ആദ്യമായി അഭിനയിക്കുന്നത്. ഷാജി എൻ കരുണിന്റെ ഓള് എന്ന ചിത്രത്തിലെ കഥാപാത്രം എസ്തറിന്റെ കരിയറിൽ വലിയൊരു വഴിത്തിരിവ് ആയിരുന്നു.

2010ൽ നല്ലവൻ എന്ന ചിത്രത്തിലൂടെയായിരുന്നു എസ്തറിന്റെ തുടക്കം. ഒരു നാൾ വരും, സകുടുംബം ശ്യാമള, കോക്ക് ടെയിൽ, ദ മെട്രോ, വയലിൻ, ഡോക്ടർ ലവ്, ഞാനും എന്റെ ഫാമിലിയും മുല്ലശ്ശേരി മാധവൻ കുട്ടി നേമം പിഒ, മല്ലു സിങ്, ഭൂമിയുടെ അവകാശികൾ, ഒരു യാത്രയിൽ, ആഗസ്ത് ക്ലബ്ബ്, കുഞ്ഞനന്തന്റെ കട തുടങ്ങിയ സിനിമകളിലും അഭിനയിച്ചു.തമിഴിൽ മിൻമിനി, കുഴലി എന്നീ രണ്ട് ചിത്രങ്ങളിൽ ലീഡ് റോളിൽ അഭിനയിക്കുന്നുണ്ടെന്ന റിപ്പോർട്ടുകൾ പുറത്തു വന്നിരുന്നു.

ഇപ്പോളിതാ ദൃശ്യം 2ന്റെ ചിത്രീകരണത്തിനിടെ താൻ നേരിട്ട ഏറ്റവും വലിയ വെല്ലുവിളിയെ കുറിച്ച് എസ്തർ മനസ് തുറക്കുകയാണ്.വാക്കുകൾ ഇങ്ങനെ, സെറ്റിൽ പ്ലോട്ട് ട്വിസ്റ്റുകൾ രഹസ്യമാക്കി വെക്കാൻ ഞാൻ നന്നായി ബുദ്ധിമുട്ടിയിരുന്നു. ജീത്തു അങ്കിളും മോഹൻലാൽ അങ്കിളും ഈ കൊച്ച് എല്ലാം നശിപ്പിക്കുമെന്ന് പറയുമായിരുന്നു. തന്നോട് ആരെങ്കിലും രംഗങ്ങളെ കുറിച്ച് ചോദിച്ചാൽ താൻ മൊത്തം കഥയും പറഞ്ഞു കൊടുക്കുമായിരുന്നു.

ഒരിക്കൽ നിർമ്മാതാവിന്റെ മകൻ സെറ്റിൽ വന്നു. അദ്ദേഹം സ്ക്രിപ്റ്റ് വായിച്ചിട്ടില്ലെന്ന് എനിക്കറിയില്ലായിരുന്നു. ഇതല്ലേ നിന്റെ അടുത്ത സീനിന് ശേഷം നടക്കുന്നതെന്ന് എന്നോട് ചോദിച്ചു. അല്ല, അല്ല എന്ന് പറഞ്ഞ് ഞാൻ കൂടുതൽ കാര്യങ്ങൾ പറഞ്ഞു കൊടുക്കാൻ തുടങ്ങി. അദ്ദേഹം അത്ഭുതപ്പെട്ടു. നീയൊന്നും പറയാൻ പാടില്ലെന്ന് പറഞ്ഞ് ജീത്തു അങ്കിൾ ഇടപെടുകയായിരുന്നു.അതേസമയം, വീണ്ടും ടീമിനൊപ്പം ചേരാൻ സാധിച്ചതിൽ എസ്തർ ഹാപ്പിയാണ്. അന്നത്തെ ടീമിൽ ചെറിയ മാറ്റങ്ങളുണ്ടെങ്കിലും ഇപ്പോഴും സെറ്റിലെ അന്തരീക്ഷം നല്ലതാണെന്ന് എസ്തർ പറയുന്നു. താനും വളർന്നു. അതുകൊണ്ട് കൂടുതൽ കാര്യങ്ങൾ സംസാരിക്കാൻ സാധിക്കും. ആദ്യ ഭാഗത്തിന്റെ കഥ തനിക്ക് ശരിക്കും മനസിലായത് തീയേറ്ററിൽ പടം കണ്ടപ്പോൾ മാത്രമായിരുന്നുവെന്നും എന്നാൽ ഇത്തവണ മൊത്തം സ്ക്രിപ്റ്റും വായിച്ചിട്ടുണ്ടെന്നും എസ്തർ പറയുന്നു.