കോയമ്പത്തൂർ കാർ സ്‌ഫോടനക്കേസ് പ്രതികളുടെ തെളിവെടുപ്പ് തുടങ്ങി

കോയമ്പത്തൂർ. കോയമ്പത്തൂർ കാർ സ്‌ഫോടനക്കേസുമായി ബന്ധപ്പെട്ട് അറസ്‌റ്റിലായ നാല് പ്രതികളെ ഞായറാഴ്‌ച തെളിവെടുപ്പിനായി സംഭവം നടന്ന സ്ഥലത്ത് കൊണ്ട് വന്നു. ഒക്ടോബർ 23ന് ദീപാവലിക്ക് ഒരു ദിവസം മുമ്പ് നടന്ന സ്‌ഫോടനത്തെക്കുറിച്ച് എൻഐഎ അന്വേഷണം നടന്നു കൊണ്ടിരിക്കെയാണ് കേസിൽ തെളിവെടുപ്പ് ആരംഭിച്ചത്. കേസിൽ ഇതുവരെ ഒമ്പത് പ്രതികളെ എൻഐഎ അറസ്‌റ്റ് ചെയ്തു.

ഇവരിൽ മുഹമ്മദ് അസ്ഹറുദ്ദീൻ, മുഹമ്മദ് റിയാസ്, ഫിറോസ് ഇസ്‌മയിൽ, അഫ്‌സർ, നവാസ് എന്നീ നാല് പ്രതികളെ സ്‌ഫോടനം നടന്ന കോയമ്പത്തൂർ ഉക്കടത്തെ കോട്ടമേട് മേഖലയിൽ കൊണ്ടുവന്നു. തുടർന്ന് സ്ഥലത്തെത്തിയ അന്വേഷണ ഉദ്യോഗസ്ഥർ പ്രതികളിൽ നിന്ന് കൂടുതൽ വിശദാംശങ്ങൾ ചോദിച്ചറിയുകയുണ്ടായി. സ്ഥലത്ത് സുരക്ഷാ പ്രശ്‌നങ്ങൾ ഉണ്ടായേക്കുമെന്നു കരുതി സായുധ പോലീസ്‌ സംഘവും ഇവർക്കൊപ്പം എത്തിയിരുന്നു.

ഒക്ടോബർ 23ന് പുലർച്ചെ 4.30ന് കോയമ്പത്തൂരിൽ മാരുതി 800 കാറിനുള്ളിലെ എൽപിജി സിലിണ്ടറടക്കം പൊട്ടിത്തെറിക്കുകയായിരുന്നു. അപകടമാണെന്നാണ് ആദ്യം കരുതിയത്. യുഎപിഎ വകുപ്പുകൾ പ്രകാരമാണ് പ്രതികൾക്കെതിരെ കേസെടുത്തിരിക്കുന്നത്.

ഐഎസ് ഭീകരസംഘടനയോട് കൂറ് പുലർത്തി ഒരു പ്രത്യേക മതവിശ്വാസത്തിന്റെ ചിഹ്നങ്ങൾക്കും സ്‌മാരകങ്ങൾക്കും വ്യാപകമായ നാശനഷ്‌ടം വരുത്തുകയും, ഭീകരത സൃഷ്‌ടിക്കാനും ലക്ഷ്യമിട്ട് ചാവേർ ആക്രമണം നടത്താൻ പ്രതി ജമേഷ മുബീൻ പദ്ധതിയിട്ടിരുന്നതായി പോലീസ് പറഞ്ഞു. സംഭവത്തിൽ മുഖ്യ പ്രതിയായ ജമേഷ മുബീൻ സ്ഫോടനത്തിൽ കൊല്ലപ്പെടുകയായിരുന്നു.

അറസ്റ്റിലായ പ്രതികൾ കൊല്ലപ്പെട്ട ജമേഷ മുബീനുമായി ഗൂഢാലോചന നടത്തിയിരുന്നതായും ഭീകരപ്രവർത്തനങ്ങൾക്കായി ഓൺലൈൻ ഷോപ്പിംഗ് പ്ലാറ്റ്‌ഫോമുകളിൽ നിന്ന് വാഹനത്തിൽ ഘടിപ്പിക്കുന്ന ഐഇഡി ഉൾപ്പെടെയുള്ള സ്‌ഫോടക വസ്‌തുക്കൾ നിർമ്മിക്കുന്നതിനുള്ള വിവിധ രാസ വസ്‌തുക്കളും മറ്റ് ചേരുവകളും വാങ്ങിയിരുന്നതായും പോലീസ് പറയുന്നു.