പി.ടി.7ന്റെ കാഴ്ച വീണ്ടെടുക്കാൻ ശസ്ത്രക്രിയ ഉടൻ, തുള്ളിമരുന്ന് ചികിത്സ തുടരുന്നു, പ്രതീക്ഷയിൽ വനംവകുപ്പ്

പാലക്കാട്: ‘പി.ടി.7’ ആനയുടെ കണ്ണിന് നഷ്ടപ്പെട്ട കാഴ്ച തിരിച്ചെത്തിക്കാൻ ശസ്ത്രക്രിയ നടത്താൻ വനംവകുപ്പ്.
വനംവകുപ്പ് മയക്കുവെടിവെച്ച് പിടികൂടി ആന ഇപ്പോൾ ധോണിയിലെ കൂട്ടിലാണ്. 20 വയസ്സ് മാത്രമുള്ള ‘പി.ടി.7’ (ധോണി) ആനയ്ക്ക് മെച്ചപ്പെട്ട ചികിത്സയിലൂടെ കാഴ്ചക്കുറവ് പരിഹരിക്കാനാവുമെന്ന പ്രതീക്ഷയിലാണ് വനംവകുപ്പ്. കൂട്ടിലാക്കിയതുമുതൽ തുള്ളിമരുന്ന് നൽകിവരുന്നുണ്ട്.

ബുധനാഴ്ച വനംവകുപ്പ് ചീഫ് വെറ്ററിനറി ഓഫീസർ അരുൺ സഖറിയയുടെ നേതൃത്വത്തിൽ വിദഗ്ധസംഘം ആനയെ ധോണിയിലെത്തി പരിശോധിച്ചിരുന്നു. പിന്നാലെ ആനയുടെ വലതുകണ്ണിന് കാഴ്ച വീണ്ടെടുക്കാൻ ശസ്ത്രക്രിയ നടത്താൻ വനംവകുപ്പ് തീരുമാനിക്കുകയായിരുന്നു. മുമ്പ് ജനവാസമേഖലയിലിറങ്ങി നടന്നിരുന്ന സമയത്ത് എയർഗൺ പെല്ലറ്റ് കൊണ്ടാണ് ആനയുടെ കണ്ണിന് കാഴ്ച നഷ്ടപ്പെട്ടതെന്ന് സൂചനയുണ്ട്.

ആനയെ പിടികൂടുമ്പോൾ വലതുകണ്ണിന് കാഴ്ചക്കുറവുള്ളതായി കണ്ടെത്തിയിരുന്നു. സംഭവത്തിൽ വനംവകുപ്പിനെതിരെ ഹൈക്കോടതി കടുത്ത വിമർശനം നടത്തിയിരുന്നു. പിന്നാലെ ആനയ്ക്ക് സാധ്യമായ എല്ലാ ചികിത്സകളും നടത്താൻ വനംവകുപ്പുമേധാവി ഉദ്യോഗസ്ഥർക്ക് നിർദേശം നൽകുകയായിരുന്നു.